 |
Questa pagina a no l'è stæta corretta. | |
Mi son quello che son, discöro sempre, e mâ,
E o naso da per tûtto vêuggio sempre ficcâ;
Vaddo in giandon, e a-o giorno montiö trexento scae;
Striscio di pê, camminn-o comme se avesse e ae;
So tûtte e belle ajette do teatro, vesto ben,
No temmo e tacche, ho a faccia pezo che i ciarlatten;
Vêuggio saveì de tûtto, de mûxica, de ballo,
De scherma (ma no sfiddo); so ben montâ a cavallo.
Ho poca bonn-a fede, ninte punto d’onô,
Ma so con tûtte e donne sûbito fâ l'amô.
So e novitæ galanti, e i cæti scandalosi,
Ho sempre e stacche pinn-e de biggetti amorosi;
Me vanto d’ëse bello, de no fâ ninte a-o giorno,
In letto andâghe a l’alba, levâme a mezzogiorno.
Mi mangio e beivo ben, ninte me piggio a-o coêu,
E a l’occaxion so mette a ûn sciallo ûn puntaiêu.
Disprexo i dotti, i critico, me piaxe ciù ûn sciurbetto:
Comando, e vêuggio sûbito, ma pagò ûn pö adaxetto.
Son petulante, ardïo, no so cose me credde:
In Gêxa gh’intro solo per vedde e fâme vedde:
Che bella vitta fasso!.... no so se a posse dûâ;
Basta..... se n’accorziemo ä fin de carlevâ.
