 |
Questa pagina a no l'è stæta corretta. | |
Mondo nêuvo, Marmottinn-a!
A quest’atra Vedûtinn-a.
Là gh’è o Teatro, intremmo drento,
Gh’è Opea seria de segûo,
Da-e risate l’argomento;
Bella lampa! palco scûo!
Ricca sala! grande piena!
Bravi Attoî!... ma no se pêu
Vedde ben comme se vêu,
Che tappôu l’è tûtta a scena
Da ûnn’arcadia là d’avanti
De Cappelli e de tûrbanti
Che no fan che remesciâ!...
No se pêu sentî cantâ
Pe-o gran sciato di Palchetti,
Ciarle, zêugo, amoî, sciorbetti,
E o mogogno continuôu
D’ûn vexin poco edûcôu,
Che con voxe dissonante
O pretende de cantâ,
E ciù forte che o Cantante,
Aje, dûetti, cavatinn-a,
E cioccâ quando ghe pâ!...
Mondo nêuvo, Marmottinn-a;
A quest’atra Vedûtinn-a.
Miæ un pö là... ma se fa scûo,
Manca l’êujo de segûo,
O a lûxerna a se m’inversa,
Veddo e cose a controçê!...
O me pâ o Mondo ä reversa...
Stelle in tæra! di Ommi in çê!
Di Serpenti co-e fädette!
E di Lovi co-e braghette!
