 |
Questa pagina a no l'è stæta corretta. | |
45
In stradda a stà in zenoggie
A reçitâ cönette,
Ma manco de fregoggie
Ghe ciêuve in te tassette.
46
Se dixe a l’è impostûa
No gh’hò un quattrin da dâ;
Oh che risposta crûa
Per chi s’hà da sfamâ!
47
Ma pe dâ gusto ai sensi
Pe contentâ i caprizj,
O fomentâ di vizj
Dinæ ne veddo immensi.
48
Solo pe o fradellin
No gh’è soccorso, o agiutto,
Ammiæ in che intrigo brutto
S’attrêuvan i meschin!
49
Cappita all’Accasêua
Un gran divertimento,
Questa a l'è roba nêua
Zeneixi intremmo drento.
50
Zêughi, bazigo, e slitta,
Vinetto, e birra bonna,
Oh buâ, che bella vitta,
Che spazio a ogni personna!
51
Chi se ghe spendan ben,
Gh’è grande, gh’è frescoso,
Gh’è un scito delizioso,
Chi n’hà appettito, o ven.
52
Sotto l’erboetto ombroso
S’assetta in scîa carega
O zoveno amoroso
Che a scignöettinna o prega.
53
De favorì un sciorbetto
(Bevanda da stagion)
Con quarche pastissetto,
E o fà conversazion.
54
De quello che seguià
No ve sò di de ciu,
Chi hà da pensaghe sciu
L’exame fâ porrià.
55
Passemmo a un’atra vista
Lascemmo de slittà,
E vegnan chi in revista
Quelli che trattan mâ.
56
O mondo o và â reversa
I Ommi son Figgiêu,
A gente a l'è perversa
Torno a ridilo anchêu.
57
No van ciu e cose in ordine
Come pe i tempi antighi;
Veddo ciu d’un disordine
E dappertutto intrighi.
58
Oh quanti gh’en che mangia[n]
E mangian da doe parte,
Ingannan con tant’arte,
Che mai de cô no scangia[n]
59
Oh quanta povea gente
Rovinna un Avvocato!
O mostra lì in t’un säto,
Che a Lunna a l’è un Serpe[nte]
60
Se gh’è chi no se o cre[dde]
O porta de raxoin,
O preûva, o ghe o fà ve[dde]
Con çento paragoïn.
