 |
Questa pagina a no l'è stæta corretta. | |
12.
Særa o crocco a gran Cascia, oh che esprescion
Maragian o l'à fæto parlâ o legno,
Ogni figûa fà vedde unna pascion,
Ogni testa, ogni gamba a l'é à so segno;
So’ i Moi, e i Saraceni in confuxion;
Tutto de l'arte, e de l'Aotô, l'é degno.
Ma s’oì[sic] vedde unna cosa de ciù ardîe
Miæ o cavallo, e scappæ, co[sic] no ve tîe.
13.
Palosso, ti ê contento, aoa ti pêu
Tornatene lazzù coi ciù a quetâ,
Ma tutti i anni se o destin o vêu
Te prometto de fâte ritornâ,
E dâte o gusto, che tò dêto[sic] anchêu ,
Vattene all’atro mondo a raccontâ
Cose ti æ visto, e cose ti êu ancon vedde,
E che faççe âtrettanto chi no credde.
14.
Appenna queste paole proferîe
Dao Genio protettô do gran Palosso,
Sciorte unna squaddra fêua de brutte Arpîe,
E se ghe caccian tutte quante addosso;
Appenna son spontæ, che son sparîe,
Appenna l'han toccoù, ch’o l'é in to fosso.
Bon viâgio, l'han ben fæto camminâ;
Aian poia, ch'o n'o[sic] gh'oêse ciù tornâ.
