 |
Questa pagina a no l'è stæta corretta. | |
Vegnian d’Italia a-ö nostro
Congresso i dotti, e riendo
Ne dian: do Sommo vostro
A statua dove a l'è?
Ma dunque ean vane e finte
E voxi che n’ei sparso:
No risolveivi ninte?
Ma comme? ma perchè?.. .
D’Italia e capitali
I ricchi monumenti
Di celebri e immortali
So Sommi n’han mostrou,
E voi contando foe
No ne mostræ nisciuña
Memoja dell’Eroe,
Che tanto eì decantou!
Doviemo noi suppoñe,
Che ne-a Çittæ de Zena,
S'è lesti ne ö propoñe,
S’è pigri a l’eseguî?
Ma alloa perchè da tanti
Annunzii strepitosi,
E tanto tempo avanti
N’eì fæto prevegnî?
Pe scuza ne dieì forse,
Che a un monumento tale
Mancavan e risorse,
Che i mezi en limitæ?..
Eh! dove son i figgi
De quelli antighi illustri,
Che favan di prodiggi
Per abbellî a Çittæ?
