Pagina:Marston56.46-133.djvu/44

Da Wikivivàgna

levao, e lantora o renovà monti mirachuli, e monti levroxi e paraletichi e segi fon sanai, e alchuni morti resusitai, e pöa lo inperao fè reffâ monte zexie de l'avei de Scodroe, e pöa restituì ogni prea in la soa citë, e a tuti li poveri o sovegnì segondo la soa necessitae, e se ne retornà in Constantinopori pin de ogni vertue, preseverando senper la fe' de la santa croxe e de Ihu. Xe. lo qua è beneito in secula seculorum.

Amen.


Mirachullo de la santa croxe.

De la vertue de la santa croxe se ne cointa monti mirachulli, e inter li atri se cointa che intrando um Zuê in la zexia de santa Soffia de Constantinopori, ello goardà e vi una imagiem de messê Ihu. Xe. e preize um cotello e ferilla in mezo de la gora de la dicta imagiem, e deprezente o ne insì monto sangoe, si che per tuta la fassa e la testa de lo Zoê[sic] ne andà. De la quâ cossa o fo monto spaventao e deprezente o preize la dicta imagiem e butalla inter um posso, e pöa o se misse a fuzir. E um crestiano lo trovà e ge disse: "Unde fuzi-tu zuê, o non po esse che ti non abi morto quarche homo, che tu ê tuto pin de sangoe?" E lantor lo Zuê ge disse: "Veraxementi lo Dee de li crestiani è grande e la soa fe' è soma e veraxe in ogni pröa." E disse "E' non o ferio homo terrem, ma e' o ferio la imagiem de Ihu. Nazareno, de la quar incontenente n'è insîo sangoe." E pöa questo Zuê menà lo crestiano a lo posso, e preizem la dicta imagiem, la quâ fin a lo jorno de anchöi se mostra e pâge anchora lo segnâ.


Mirachullo de la santa croxe.

Lezese che Andrea vescho de la citae de Fondania si consentiva che una santa femena relegioza habitasse in lo so veschao. E lo marvaxe inimigo monta fiâ la nonte[sic] de la bellessa de questa femena reprezentava davanti a questo vescho, e ello in questo se repossava. Or in quello tenpo veiando um Zuê da Roma e prendandolo la nöcte, ello non poiva azonzere[sic] a nissum abergo, e ello goardà e vi um tenpio de pagain, unde elli oravam lo Apollo. E lo dicto Zuê se segnà de lo segno de la santa croxe, non inpersò che in ella avesse fe', e se misse a possar quella nöcte in quello tenpio. E quando o vègne l'ora de mezanötte e ello se desvegià e vi vegnî monti spriti malligi[sic] con um so principo, lo quar sezeiva in mezo de lor sum una grande cedia, e cossì sezando ello incomensà a serchâ le marvaxitae che aveivam faito questi söi conpagni. E cossì vègne davanti a questo um maligno sprito e si lo incomensà adorâ.

E lo principo ge disse: "De unde vegni-tu?"

E ello ge disse: "E' vegno da la cotâ provincia, unde e' o xitao[sic] monte breige e monto sangoe e' g'o faito spande, e persò e' sum vegnuo a ti como mê segnor a manifestâte queste cosse."

E lo principo Satans ge disse: "In quanto tenpo ai-tu faito queste cosse?"

E ello ge disse: "In III- jorni."

E lo principo ge disse: "In tanto tenpo ti non ai faito moi cosse!" E comandà che questo devesse esse monto batuo.

E pöa o ne venge um atro chi disse: "Segnô, e' sum staito in mar e si o susitao una grande tenpesta, per che monti navirei sum perij e monta gente è morta."

E lo principo ge disse: "In quanto tenpo ai-tu faito questo?"

E ello ge disse: "In II- jorni."

E lo principo comandà che ello fosse batuo e disse: "In tanto tenpo ai faito cossì picena cossa!"

E pöa o ne vègne um atro e disse: "E' sum staito in una citae unde se fava grande nose, e lì e' ge missi una grande discordia, per che lo spozo e monti atri ge sum morti."

E lo principo ge disse: "In quanto tenpo ai-tu faito questo?"

E ello disse: "In X jorni."

E lo principo ge disse: "E como, in tanto tenpo non ai faito pu cosse!" E comandà che ello fosse batuo.

E pöa o ne vègne um atro chi disse: "Mi vegno da lo solitario, unde e' per tenpo de IIII- agni unde e' o abatuo um servo de Dee e in questa nöcte e' l'o faito caze in lo peccao de la carne."

E lantor lo principo se levà de sum la carega e asetàge quello e fège grande onor e ge disse: "Ti ai faito grande cossa, e pu cha tuti li atri, e ê degno de honore[sic]."

E pöa o vegne um atro demonio chi disse como ello avea aceizo l'animo de Andrea vescho in amâ la santa monega, e avea za faito tanto che com le main e l'avea tochâ in lo vizo.

E lantora lo principo conffortà monto questo e ge disse: "Va e conbati varentementi con ello e fa sifaitamenti che ti conpissi quello che ti ai incomensao de fâ, asochè quello vescho e' lo possamo avei."

E pöa lo principo disse a li demonei: "Andai e goardai quello chi in quello canton dorme in terra."

E li demonei vègnem sorve questo e trovànllo segno de lo segno de la santa croxe, e lantora li demonei dissem: "Goai a noi! Ello è um vaxello, ma ello è segno de lo segno de la croxe."

E pöa tuta quella conpagnia de li demonei se partì e lo Zuê se levà e deprezente se ne ze a lo vescho e ge cointà tute queste cosse per ordem. E lo Zuê se batezà a la santa fe' catolicha a l'onor de messê Ihu. Xe. chi è beneito in sechulla sechullorum.