 |
Questa pagina a no l'è stæta corretta. | |
incomenssà a cresse, elli se adementegàm anchora Dee, e favam lor dee in diverssi modi, e tornavam in erô como elli eram da prima, si che non ge era chi cognosese pu Dee, ni chi pu lo temesse. E in quella generaciom nassè um chi fo ihamao Abram, chi ave bon seno e bona natura, e penssà che quello chi avea creao tute le cosse fosse veraxe Dee, e incomensàllo a orâ monto freventementi. Or lo Segnor Dee vegando lo so bon cor, si se fe manifestà in tar mainera che ello inluminà lo so animo de la via de la veritae, e cresege monto la soa volontae e la soa semenssa, e dège a cognosse de unde posee lo povo de li Zuê, e dège tanti bem che longo sarea a cointâ la materia. E za persò non restava che tuti quelli chi morivam non zeissem in stao de tenebre e quando Dee Paire onipotente vi questo, si ave pietae de la creatura che ello avea faito a la soa inmagem, per che, quando o fo logo e tenpo, o mandà lo so Figor, soè la vertue de lo Sprito Santo chi vegne in lo ventre de la Vergem Maria, de che ello nassè sensa semenssa de homo, lo qua fo Segnô pocente e mizericordiozo e bom, chi vosse soferî morte e passiom per scanpâne da la oschuritae de lo inferno, unde andamo tuti per lo peccao de Adam lo prumê homo. E Ello converssà in terra con li homi per tenpo de agni III.III e meixi III e quando o fo de agni III. o se fè batezâ per dâne ex[e]nprio che se devessemo batezâ e depoî lo batesmo ello fè monti miracoli, sanà levorxi, luminà cegi, resusità morti, e monti atri segnai fè sorve monti con la soa parolla. E poa o mandà li soi disipori per tuto lo mondo prichando a la gente la soa incarnaciom e la soa morte e passiom e la soa resuresiom. E um de questi soi disipori vègne in questa terra de India, so fo messê san Thomao, chi monti ne batezà in questa provincia con la soa prichaciom. E tuti questi apostori favam li miracolli che te o dicto de sorva per la gracia che lo Figior de Dee ge avea daita. Or li principi de li Zuê e li soi pontifici se movèm monto a ira contra de questi per la lor invidia e li perseguivam monto, cossì como e' fem lo Figor de Dee, che elli fem morî sum la croxe, e resusità lo terso iorno, e montà in cel, e poa o mandà a questi soi apostori lo Sprito Santo, e deprezente elli sapem parllâ tute le lengoe de lo mondo. Monte atre cosse se porea dî, ma ti non te poressi tegnî tanto a mente, ma questo Ihu. Xe. si è Dee veraxe e Sarvao de tuto lo lo mondo, e se ti lo reseverai in lo to cor, Ello como bom Segnor te reseverà."
E quando Joxaffà ave inteize questi[sic] parolle, tuta la soa anima fo inluminâ de grande alegressa con um frevô de sprito, e incomenssà a abrassâ Barllam e dissege: "Verax[e] e forte è questo to Segnor, e pim de grande mizericordia. Ma questa prea precioza, soè Xe., non po goardâ salvo quest quelli chi sum sai de cor. E sapi Barllam che tute le toe parolle sum bem intrë in lo mê cor, e tuta la tristessa che e' avea s'è tuta partia da mi, e se ti sai dî pu avanti, e' te prego che ti non me degi cellâ nissuna cossa."
Disse Barllam: "E' te dirò anchora che monti dexiram de savei e de vei, ma chi non è avanti lavao de lo so santo batesmo, non po prevegî[sic] a cognosse Dee, che ello dixe in lo Evangerio che chi non sarà batezao e non creirà, sarà danao."
E Joxaffà disse: "E crao fermamenti tuto so che ti m'ai dicto, e si glorifficho quello Dee che ti prichi, ma dime tuto so che e' dum fâ a stâ fermo in questa crenssa."
E Barllam respoze: "Lo promê fondamento e la reixe si è lo santo batesmo, como lo Segnor ne ameistrà in nome de lo Paire e de lo Figio e de lo Sprito Santo. E faito questo la gracia de Dee si abita in la creatura, e senssa lo batesmo non vâ niente so che se fa, e inpersò e' te prego che avanti vogi vegnî a lo santo batesmo, e poa porai conpî lo to bom dexiderio."
E poa Joxaffà domandà de monte atre cosse chi saream monto longo a cointâ. Ma, inter le atre cosse, ello disse como poiva lo corpo de la creatura resusitâ poa che ello era morto e sepellio e devegnuo terra. E Barllam disse: "Ti non dei avei de questo nissum dubio che a messê Ihu. Xe. o non g'è nissuna cossa inposiber a far. Za per so ordenamento è faita la anima e lo corpo e asai pu ge sarea lenger a fâ tornâ le anime con li corpi e resusitalli."
E poa Joxaffà ge demadà[sic] che era de la anima quando a se partiva de lo corpo.
E Barllam disse: "La anima se trova segondo che a s'a aparegiao de mâ e de bem, e poa a so logo e a so tenpo verà lo Segnô a zoigâ li vivi e li morti, e lantô piaschuna anima reseverà lo so tenpo. E quelli chi saràm stati[sic] fidê crestiani anderam in sê in la soa prepetua gloria, e li peccoi danai desenderàm a lo inferno. E cossì como in la gloria de lo cel è tuti bem sensa nissum mâ, e cossì in lo inferno è tuti mai senssa nissum bem."
E Joxaffà disse: "E li corpi resusiteràm cossì como elli som aora, o prenderàm atra forma?"
E Barllam disse: "Lo nostro Segnor Dee renoverà lo cel e la terra e so se intende lo cel de lo frimamento con tuti quatro li elimenti, e cossì renoverà li nostri corpi coroti e incoroti e stabilli e lucenti como lo sol e saràm inmortai, e tuti saremo de la etae como era nostro Segnô quando ello resusità e montà in cel. Ma li danai se troveràm cossì como e quando e' morìm."
E poa Joxaffà ge demandà anchora e disse: "Barllam dime, la anima po mai morî?"
E Barllam respoze che la anima è faita a la xamẽ[sic] de Dee chi è raxom e memoria e volontae chi non po mai morî."
Disse Joxaffà: "Serto ti m'ai dicto monte grande cosse chi sum in parte de grande penssê e in parte de grande conforto."
Or intanto como Barllam dixea queste parolle Joxaffà stava con lagreme e contriciom e si ge disse: "E' te prego che ti me mostri la via per che e' possa aquistâ vita eterna."
E Barllam disse: "E' l'è scripto che quando san Pero apostoro prichava la fe de messê Ihu. Xe. a lo povo, che una fiâ e' ge demandàm e si ge dissem: «Che demo noi fâ asochè seamo salvi?» E ello respoze: «Seai batezë e fë penetencia e sarei salvi». Unde e' te digo che ti te aprossimi a quello chi t'a recatao de lo so preciozo sangoe e traito de le peñe de lo inferno. E sapi che contuniamenti ello piama li peccoi a penetencia. Unde, se ti voi vegnî a ello, o te covem lassâ lo erô de queste idolle, e de questo e' te dirò um monto bello exenprio:
Tuti quelli chi adoram le idolle sum semegeivi a um erchao chi andava erchezando. E una fiâ ello preize um oxello e si lo vosse ocir. E lo rosig[n]ö si incomenssà a parllâ e si ge disse: «O homo che te crei-tu fâ de mi, e' sum picem oxello e de pocho pasto pa averai de mi. Ma se ti me lassi andare[sic] e' te mostrerò tre cosse che se ti le goarderai e' te faràm bem tuto tenpo
