 |
Questa pagina a no l'è stæta corretta. | |
15.
E lasciù ne-o Settentrion
Gh'è ciù neigro che o carbon;
E l'Autocrate da Ruscia,
Con o vento che ghe sciûscia,
O doviæ fäla finïa
Abolindo a Teocrazia.
16.
Saìva ben ch'o se spëgiasse
In Don Pedro Imperatô
Che scibben ch'o governasse
O Brazì con tanto amô,
In t'ûn ætte o s'è addesciôu
Abolio, detronizôu.
17.
Saiva ben ch'Êuropa tûtta
A cessasse i armamenti;
Saìva ben che seria e mûtta,
Pe levâ di mäcontenti,
A çercasse a päxe vëa
Sotto a mæxima bandëa.
18.
Bella Italia, fortûnâ
Mi te vêuggio ûn pö ciamâ
Pe-o Stellon che dappertûtto
O t'è largo do so aggiûtto;
Pe-a concordia, pe-o bon chêu,
Pe l'ûnion di tò figgiêu.
