 |
Questa pagina a no l'è stæta corretta. | |
Sûnetto
Tûtti me dïxan ch'o l'argento vivo
De vedde che no posso stâ in ta pelle,
Che mescio quande prego, cûxo e scrïvo,
E scinn-a in to dormî mescio e parpelle.
Mi do piaxei, do gûsto no me prîvo
De fâ mille despëti a queste e a quelle,
E, quande no ghe pensan, li gh'arrîvo
Pe fäle criâ, pe fäghe vedde e stelle.
E poi ghe daggo mille bäxi in bocca,
E poi me pento, e poi cianzo con lö,
E poi me vorto e diggo: Guai, chi e tocca!
Mi, ve confesso o vëo, son biricchinn-a;
Ma questo chêu l'ho tûtto pin, d'amô
Pe chi me parla insemme e m'avvixinn-a.
