 |
Questa pagina a no l'è stæta corretta. | |
E defæti e ferrovie
De foestê son gremenie,
Se fa zà dûxento sbraggi
Pe-o trasporto di bagaggi,
Pe l’acquisto di biggetti,
E d’intorno a-i sportelletti
Da-o stiväse tûtti addosso
Ghe pä o mâ quand’o l’é grosso;
Zà tra o sciäto e tra i spuncioîn
Se va drento in ti vagoîn.
L’é de Sabbo, e o çê lûxente
Da levante e da ponente
Ne-a sò tinta chi é turchinn-a
O no g’ha ûnn-a nûvietinn-a:
L’é o mâ carmo comme l’êuio,
E a puntin comme ûn relêuio
(Proprio in punto de quattr’ôe)
Con l’andata de scignôe
Spunta e nostre corassæ
Tûtte quante pavezzæ.
Tûtto sciû pe Castelletto,
Priamenûa, Montegalletto,
Tûtto sciû pe-o gïo de mûägie,
Zû pe-i schêuggi, zû pe-e spiägie,
In ti gôssi, in te barcasse,
Da-i poggioli, da-e terrasse,
Da-i barcoin, da-i barconetti,
E da-i teiti e da-i teitetti
C’han a vista værso o mâ;
No veddei che remesciâ.
