 |
Questa pagina a no l'è stæta corretta. | |
Là, dominôu da l'æstro mûxicale
O solfezzava quarche cavatinn-a
Con quello raro metodo vocale
Chi tramandava i segni da bazinn-a.
E ghe veddeìvi fâ ciû d’ûn segnale
Quande passava quarche scignorinn-a
Chi ghe façeîva dî pe-a sò servetta:
Andævene de chì, brûtto fametta!
O parla de carrosse, de cavalli,
De biggetti, de scûi, de marenghin,
De cacce, de disnate, zêughi e balli,
De teatri, de villezzi e de casin.
A chi o l’ha regallôu mandilli e scialli,
A chi o l'ha regallôu placche e pendin;
E s’o l’ha ûn södo o cöre da-o trippâ,
E tûtte e nêutte o dorme da-o fornâ.
