Pagina:Lunaio.reginna.1886.djvu/45

Da Wikivivàgna

A propoxito (ve a conte?)
In ta stradda nominâ
Circonvallazion a Monte
Da chi a poco se gh’andiâ
Co meccanico ascensô
Sensa manco vedde o sô.

Se faiâ döe gallerie
Larghe, aiose, illûminæ,
Pe schivä sascetti e prïe
Che se trêuva pe-e montæ,
Pe arrivaghe in t’ûn momento
Senza sforzo e sensa stento.

Chi l'avieìva mai ciù dîto
A-i mæ tempi, Cattainin,
Che s’andieìva bællo drito
De dä posta a-i Cappûssin,
Da-o Portello in Castelletto
E con spendighe pochetto?

Oh, fra poco quell’ærtûe
Saian tûtte popolæ,
Da ciù d’ûn saian tegnûe
Pe bellesse da çittæ,
Pe vedute sorprendenti,
Sann-e, comode e ridenti.