Pagina:G. Peragallo - Poesie - 1870.djvu/43

Da Wikivivàgna

— 41 —

Se ve pä d'aveì pregôu ,
Tutti duî pe-o stesso fin,
Ritornæ de bonn-a lûnn-a,
Piggiæ ûn caliçe de vin,
Fæve ûn brindixi e sacciæ
Quello dito de mæ poæ
Che due corde pêuan ciù che ûnn-a.
Queste paole persuadeivan
Tanto quanto, ma no poeivan
Totalmente abbonassâ
O figaeto d'ûn mainâ,
Quando in mezo a tanta guaæra
O mæ amigo Pagna Gnæra,
Quæxi in estaxi rapïo,
Forte o sbraggia alsando ûn dïo:
Veddeì là sorve Patëa
Unn-a specie de lûmmëa
Tûtta raggi e senza côa,
Che de véddia a l'innamôa,
(E l'ho vista e o porriæ zûâ
Unn-a lûxe in Çê brillâ)
D'un cô scimile all'argento?
No sentï che sciûscia ûn vento
Chi ne porta senza voeì
Verso a lûxe che veddeì?. . .
(E veamente l'ho sentïa
Unn-a specie d'arbaxïa
Chi sciûsciava, chi sciûsciava
E che driti a ne portava
Verso o lêugo nominôu).