 |
Questa pagina a no l'è stæta corretta. | |
Poveo bestia! questa gente
Sciù de d'äto a no se sente.
Me dieì, ti co-a tò caladda
Ti væ mezo fêua de stradda.
Cose importa a-i Senatoî
Queste braghe ch'eì fra voî,
E comm'intran ne-a Conquista
De Reliquie do Battista?
Cäo Senato Sereniscimo,
Sciscignor gh'intran beniscimo,
Senza queste no porriæ
Contâ e cose comme son,
Senza queste ve doviæ
Spifferâ ûnn-a confûxion
Confûsiscima, discorde.
Mi che sò che quando e corde
Son co-e gûmene intrighæ,
Co-i antenne, co-i pennoin,
Chi non ha o prinçipio e o fin,
No se pêuan desgarbûggiâ,
Ho creddûo che faeiva mâ
A taxeì quanto v'ho dito.
Senatoî, s'ho da fâ fito
No me stæ ciù a interrompî.
Continuava fra de noî
A rattella, e me sentiva
Tûtto o sangue chi buggiva,
Tûtt'assemme säta in pê
Rocca Zizzoa, timonê,
Ommo vegio e de talento:
