 |
Questa pagina a no l'è stæta corretta. | |
- 34 -
E dolente de no poeì,
Comme saeiva sò piaxeì,
Fâ o racconto da Conquista
De Reliquie do Battista,
O m'ha dito: Bacciccin,
Za che devo tiâ o gambin,
E fâ ûn viaggio all'atro mondo
Sorva ûn mâ chi non ha fondo,
Né ciù spero cangiâ stato,
Vanni ti; parla in Senato.
Za te diän che ti ê ûnn-a sûcca,
Te gh'örrieiva ûnn-a perrûcca,
O capiscio, ma va là
Che ti parli comme va.
Ti sæ ûn pö de Calepin,
Ti conosci l'abbacchin,
Ti hæ stûdiôu l'ûmanitæ,
N'aggi puïa che ti n'hæ assæ;
Ti ê ûn garson de bonn-a pasta,
Ti ê Bacciccia, e tanto basta.
Unn-a cosa t'arregordo,
Seggi in tæra, seggi a bordo,
D'aveì sempre ne-a memöia
O mæ affetto pe Portöia;
Ciccia cäo, se ti m'êu ben,
Amma sempre i Portolien;
Poi perdendo o barbacïo:
Aimé a pansa, o criava, addio.
Illustriscimi, son chì,
E per lê ve parlo mi.
