 |
Questa pagina a no l'è stæta corretta. | |
SÛNETTO 1
Sêunna e campann-e a festa... Andæ, credenti,
Congiunti e amixi, in quello tempio intræ,
Per vedde, fra i angelici concenti,
Comme se forma a vëa feliçitæ.
Vergine ûmile, in ricchi abbigliamenti,
Pompe vane, abborrie presto cangiæ
In spinn-e, croxe e in pövei vestimenti,
Consacra allegra a Dio a sò castitæ;
Sposâ celeste, o sò voto é adempio,
A l'é paga, ma a l’esûlta in monestê,
Da ogni inscidia segûa, da ogni sospïo.
A prega, a se fa santa... Ah beata Lê!
Figgia diletta, ti é[sic] ti quella... Addio!
Ti lasci o mondo, ma ti acquisti o Cê.[sic]
