Pagina:Chittarin zeneize 1881.djvu/501

Da Wikivivàgna

Ma rispondime me sento
E da Lion e da Pariggi,
Da Milan e da Torin,
Fin da-e sponde do Tamiggi,
O l’é ûn tò conçittadin:
O l'é Scïgoi chi ha sûnnôu,
E chi s'é immortalizzôu
Giûstamente fra noî ätri;
Ciocca ancon i nostri teatri
Da-i evviva prodighæ
A-a sò rara abilitæ;

Va sûperba, Zena, anchêu,
Gödi, applaudi a ûn tò figgiêu
Fæto apposta per sûnnâ;
Quello dito fa scordâ
Nemo in patria sua propheta,
Che o l'é ûn genio stravagante
Chi fa passi da gigante
Pe arrivâ presto ä sò meta,
E o l'é zà ûn gran professô
Chi fa ä patria e a Italia önô.