 |
Questa pagina a no l'è stæta corretta. | |
SUNETTO 1
Brava, Rinaldi, bello pestûmmin,
Ti ê fæta apposta per ballâ, in veitæ,
A-e ciù brave ti levi o presûmin,
Che in faccia tò no vän ciù duî dinæ.
Che se vaddan a asconde, per caitæ,
O per piaxeì inségnighe ûn pittin;
Lö son brave in ti sò domeneghæ;2
Ti brava in tûtto e sensa avei morbin 3.
Dove ti hæ destannôu tanti gaibetti,
Quella grazia, giûstessa e precision,
E tanti zêughi d’ægua e rebighetti?
Ti me pæ ûn pastiççetto da boccon;
Ti dipinzi co-i pê, ti fæ pissetti... 4
Ah! che Lûçiette poche ghe ne son.
