 |
Questa pagina a no l'è stæta corretta. | |
87.
E a un discorso sciffæto, brutto impasto
De veitæ, de böxie e de giastemme,
D’orgoglio insopportabile, de fasto,
E de sfêugo de raggia d’un chi fremme
Per un nêuvo e terribile contrasto,
Gh’applaudivan d’accordio tutt’insemme
I diai con un gran sciato tumultuoso,
Ch’ô paiva ô fô d’un uragan furioso.
88.
Poi giastemmando e urlando a squaddra immonda
A säta con un lesto e brusco ardio
Do vulcan ne-a voragine profonda;
E zù preçipitando in gruppo unio
Fin ne-ô centro do Tartaro a s’affonda.
E là buttando un spaventoso crio
Nêuve sciamme a raduña e nêuvi diai,
E a torna in sciù furiosa ciù che mai.
89.
L’impeto e ô fô, co-ô quæ respinze e straggia
Toccôu da-a miccia appeña un gran cannon
Fumme, povee infiammâ, balle e metraggia,
O l'è un debole e insulso paragon
Per esprimme ô furô, l’impeto, a raggia,
O disordine, ô sciato, a confuxion,
Co-a quæ sciortivan fêua da-a bocca ardente
Do Cotopaxi i diai de l’Occidente.
90.
Sciortiva apprêuvo a-a societæ infernale
De fêugo e solfo e de prie aççeise e grosse
Colonna spaventosa colossale,
Che paiva che da-i diai diretta a fosse
A mandâ in çenie ô trono a l’Immortale;
Nuvie immense de fumme neigre e rosse
A circondavan tutta e in t’un momento
Ne restava coverto ô firmamento.
