 |
Questa pagina a no l'è stæta corretta. | |
43
Ma ciù grave e imponente a sä a protesta
Quando circa duî tersci da Nazion,
Parte a ciù saña, liberale e onesta,
A s’apponiä co-i arme ä ribellion
De quelli indegni, i quæ pe uña fûnesta
Vertigine vorriân scinde l’ûnion,
Union feliçe, opea sûblime d’ommi
De chêu giganti, e d’intelletto sommi.
44
Liberali degeneri e insensæ,
Posteri indegni de miggiæa d’eroi,
Lô reneghiân progresso e ûmanitæ
Con voeî perpetua a scciavitù di moi,
Scciavi lô stessi de l’aviditæ
De guadagni non retti e de tesoi,
Scciavi d’ûsi i ciù orribili, de vegi
Pregiûdizii e d’ingiûsti privilegi.
45
Egoïsti, nemixi d’un governo
E d’ûn popolo amigo do progresso,
Che vorriàn abolio l’obbrobrio eterno
Di popoli civili, ô scciavo oppresso,
Ammermandone i peisi e ô crûssio interno,
Lô n’aviàn nè verghêugna nè ribresso
De spartîse da quelli, e separæ
Armâse contro i mæximi so fræ.
46
No riûsciàn ne l’intento: do profano
Scisma n’aviàn castigo e disonô:
O popolo europeo e l’americano
O veddiä con disgûsto e con orrô
Quanto reo çittadin, quanto inûmano
Quant’ommo vile l’è ô speculatô,
Che a-e peñe pe-i so calcoli ô pêu reze
D’un atr’ommo e avventâse a chi ô proteze!
