 |
Questa pagina a no l'è stæta corretta. | |
87
Dov’ëan solo condûti, vasche o fonti
Formæ da l’ægua che ven zù da-ô çê,
Dove stradde no gh’ëan pe-i cen, pe-i monti
Larghe e astregæ, ma semplici sentê,
Che tracciavan e sampe di bisonti,
Do böa e scagge, o do selvaggio i pê;
Mentre a säti oppù a corse disûguali
Passavan cen e monti ommi e animali.
88
Dove non ëan e scioî comme in clausûa
Restreiti o coltivæ dentro uña særa,
Nè a frûta deliziosa, nè a verdûa
Confinâ in orti che ûn mûaggion rinsæra,
Ma in campo averto, comme a dà a natûa,
Tutta spontanea comme a porze a tæra,
O in çà e in là solitaria, o a costi ûnia
Senz’ordine, disegno e scimmetria.
89
Rozzo comme ô terren, che i sostegniva,
E crûo comme uña bestia a se ô procaccia,
O l'ëa pe quelli ô çibbo, ch’ô i nutriva,
Reixe, o frûti, o granagge, o a pesca, o a caccia;
In quanto ä veste parte a se croviva
O corpo, comme noî e moen e a faccia,
Parte a portava in dosso pe costûmme
Pelle de pescio, oppù scösæ de ciûmme.
90
De so cabanne poi ne-a costruzion
Tanto artifizio aveivan drento e fêua
Quanto ô castoro ne-a so abitazion;
E aveivan tanto inzegno a tesce a stêua
Quanto un agno a so ræ e ô so padiggion;
E in guæra quæxi pæge i arme e a schêua
Di ratti e ræne (noti ne-a poexia
D’Omero) da Batracomiomachia.
