 |
Questa pagina a no l'è stæta corretta. | |
—( XIII )—
39
Ma a Teologia a l’opposto a l’ideale
Poetico sempre a l’è d’ûn grande aggiûtto
Elevandose a-ô sopranaturale:
De fæti i sommi poeti dapertûtto
Han sempre destinôu ne-a so poexia
O posto ciù distinto ä Teologia.
40
Cose creddessan poi no ne so ninte:
No so se a religion a fede viva
A foise in quelli di anime convinte,
O solo ûn’opinion speculativa
E in generale senza conseguenza,
Comme quella do volgo, pe-a conscenza.
41
Anzi creddo, che spesso a religion
Ha l’ha ne-i poemi ô posto ciù onorato,
Comme ne-a Carta da Costitûzion
Ha ô primmo posto a Religion do Stato,
E che a serve in poexia, comme pe attresso
De politica in Corte, pe l’intresso.
42
E per questo Voltaire, ch’ô l’è ûn bûffon
E ô credde poco a-o scimbolo e a-ô decalogo,
Ne-ô so poema ô no ficca a religion?
E no a doveiva ûsâ pe ûn fin analogo
E megio mi, che comme tûtti san,
E tûtti dixan, son ûn bon crestian!
43
Ma son ûn po filosofo mi ascì;
E ûn pö per questo de filosofia,
Ma crestiaña (s'intende) comme mi,
Ho vosciûo fâla intrâ ne-a mæ poexia,
A quæ in çà e in là ne-ô poema a trovieî sparsa
Comme in sce ûna pittanza ûn pö de sarsa.
