 |
Questa pagina a no l'è stæta corretta. | |
Versi sciù donca a tutta furia in campo!
E ro tron e ro lampo
E dri versi e dra veña sen ciù lenti.
Versi, a bocca de sacco:
Veña, a furô de Bacco,
A vin,[1] per çelebrâ Regia Coroña,
Fæto divin con l’ægua d’Elicoña.
XXII.
Añimo, Muze, avanti.
In Famiggia illustrâ da tanti raggi
D’Eroi e Personaggi
Per tanti lustri e secoli abondanti,
Quâ sarà ro retræto
Assemeggiante in fæto
Ro nostro Duxe Spiñora, de nœuvo
In Çê de Giano Viçe-Giano nœuvo?
XXIII.
Tra re graçie diviñe
Proprie d’Apollo, quando o l'è de luña,
Questa chì sæ quell’uña,[2]
Che ra Muza, in sò graçia, l’adeviñe.
Sæ questo giorno chíe
Quello che a l’anno o rie.
