Pagina:Çittara zeneize 1745.djvu/246

Da Wikivivàgna

Se ra Natura, allò d'esse nasciúo,
Per prudença ro vòsse fâ canúo?[1]

V.
Ò nell’etǽ de l’ommo ciù provetta
Sença un minimo inciampo
Passeggiando ro campo
D’ogni virtù ciù soda e ciù perfetta,
Con stupô dri ciù vegi,
Oeuggio dri Magistrati ciù supremmi,
In ri caxi ciù estremmi
Lumme dri Serenissimi Collegi
Ro mireremmo attoniti e invaghíi,
Lampo e Tron a ri fæti, a ri partíi?

VI.
Ò, mentre, largo da ra Patria, espoñe
L’ódiva fin de chíe
Pubriche Ambasciaríe
Ra Famma tra re Mitrie e re Coroñe,
Ra gloria dro sò nomme,
Là publicâ comme in teatro ò in scena
Tra re glorie de Zena
Pe re Corte dre Françe e pe re Romme,
Piggeremmo per un dri primmi cappi,
Quanto ciù autorizzao da Ræ’, da Pappi?

  1. Incanutì nella prima gioventù.