Pagina:Çittara zeneize 1745.djvu/141

Da Wikivivàgna

XVII.


Questo magro avançuggio de battello,
Bon, ciù che da fâ atro, da desfâ,
Onde Ballin tra cianze e sospirâ
Se rompe aprœuo a scœuggi ro çervello,

Se ben, ciù che per scaffo de vascello,
Maxiña, o se pœu tosto battezzâ
Per retræto d’un’amora astronâ,
Da dî, Veitera lì tutta in strepello:

No te crei però moǽ de veiro a fin,
Finch’o navegherà per fregattiña
Con questa marca de Patron Ballin:

Che chi dixe Ballin, dixe Maxiña,
Maxiña segureçça dro camin,
Ra stella tramontaña dra mariña.