 |
Questa pagina a no l'è stæta corretta. | |
Tanti çercan ro mä come ri meghi,
Perché van nastûssando in ogni vaso,
Per vei se ro timon se mette a pröa.
Haora me pä che semo tûtti meghi:
Ognûn çerca de metteghe ro naso
Donde re scimie han confinao ra cöa.
Porzime quella man, che chiù dro laete
Avanza de gianchezza e famme chiera
Con re moinere che d’Amö son faete,
Cagnazza, traditora, lozenghera:
De non fa chiú che a ro barcon te aguëte,
Che me dispere a stä pe ra chiarlera,
Perché ro pennä tanto increscie a tûtti,
Che per bestento ho foi piggiao dragûtti.
Governao de Sann-a
L’atro sonetto tosco, che ghe mando
In compagnia de questo mae zeneize,
Perchè re mae neccescitae se inteise,
Ghe scrivo per schivä ro contrabando.
Ro mae bezeûgno gh’anderó amostrando
Come segnö magnanimo e corteise:
Veirá che n’ho da reparä re speise
S’ha leva chi me va ha intertegnando.
Vegio m’atreûvo e privo gentirhomo,
De messë Giano son reixe descheita,
Povero son, ma in tûtto ben nasciûo.
Da mae sostanza non staró a dï como
Mae poere ha consûmao, sorte mareita,
Ro qua picchin restei desperso e nûo.
