O seunno do sciô Regin-na
| O seunno do sciô Regin-na ch'o l'ha fæto a neutte do 29. In sciä Cometa do 1832. de |
| Zena, Stampaja Como 1832. Exemprâ conservao inta Libraja Naçionâ de França, da-a coleçion do Paul Ristelhuber. tra parentexi quaddre i caratteri da azonze, tra parentexi rionde quelli da esponze. |
O SEÛNNO
DO SCIÔ REGIN-NA
c[h’]ö l[’h]a faeto a neutte do 29.
In sciä Cometa do 1832.
E comm’æla stamatin-na?
Ti m’adesci de bon[’]öa:
Cose gh[’]ælo caa Rosin-na?
Sempre a solita demöa
D’adesciame co-a perucca,
E de battime a mæ nucca:
Ti sæ ben che inspaximou
Tr(æ )öue[1] fa me so(n) accuegou.
Stavo tutto arrensenío,
E crovivo co lenzêu
Fin-na a testa, che o mæ cœu
O batteiva a marteletto
Tanto forte che tremavo,
E ballava fin-na o letto:
Non in letto ma in ta puela
Mi me paivo daa gran puîa
Pe-a Cometa do Sciô Biela;
Che a doveiva portâ via
Tutto o mondo co-a spasuïa.
Finalmente lode a Dio
Dopo tanto ho un pò dormio.
Quante cose m’assunavo,
Caa moggiè se ti savesci!!.
Quante ho visto novitæ!!!
Quante ho inteiso raritæ!!
Ma in to megio ti m’adesci
E ti picchi perucchæ.
Verso a Stella Tramontan-na
Se vedeiva quella Casan-na
Vêuggio dì quella Cometa
Che l’è di anni che a s’aspëta
Tutte e gente inspaximæ
Ean pe-e ciaççe inzenuggiæ:
Chi cianzeiva, chi pregava,
Chi taxeiva, chi sbraggiava,
Chi dormiva, chi ronfava:
Se sentiva molta gente
Confeççâ pubblicamente
I pecchæ ch’aveivan fæto
Tutti i danni ch’aivan dæto.
Se vedeiva un usurajo
Reçitâ tutto o rosajo,
Ogni Ave che o finiva
Un sacchetto o restituiva,
E o dixeiva son pentio
Perchè o mondo o l[’]e finio...
Poi ho visto un avaron
Lungo, secco, consumou
Che o dixeiva in zenoggion
Aoa son tutto cangiou;
I mæ sacchi de dinæ
Seggian tutti dispensæ
A-e famiggie abbandonæ,
E o l’alzava sempre e braççe
Che a Cometa a nò bruxiaççe.
Gh-ea un ricco che o pregava
Reçitando o Pater nostro
Quanti povei o ciammava,
O ghe diva sangue vostro
O l[’]e quello che dispenso:
Mi ve-o daggo perchè penso
Seggie tutto terminou.
Poi un atro l[’]e spuntou
Che o sbragiava vegnî chi
O vui atri conduttui,
Piggiæ chi ve restituiscio
A pixion antiçipâ
A Cometa a ne da o liscio,
A ne vêu tutti bruxiâ.
Poi un atro o dixe forte
Poveo mi che nò pagava
Quello fruto vitalizio
A un-na vegia che a l’andava
Lazzù verso o preçipizio;
Ghe pregavo sempre a morte,
Ma un-na morte naturale,
Che a Cometa ch’è per l’aja
A l’apporta in generale,
E a l[’]e morte straordinaja.
Poi ho visto di imprestê,
Di sensæ, guasta mestæ,
Tutti favan penitenza,
Tutti divan gh’êu pazienza
Perdonæne giusto Dio,
Za che o Mondo o l[’]e finio!
Poi me nasce a cujoxitæ
Di[sic] piggià un canocciale
Perchè a vista naturale
No vedeiva lonxi assæ
Allöa ho visto a sciâ Cometa
Che a l’aveiya comme un poeta
Un-na lunga, e gran perucca
Missa inversa sorve a nucca,
E gh[’]ea drento gente assæ
Comme a Barca di despiæ,
E l’Autô da Trabisonda
Gh-ea appeiso da un-na sponda
Che o non pueiva mai intrâ
Perchè o vueivan bastonâ
E implorava per risorsa
Poise appende a sò borsa.
A quell’atro poi de Sturla,
Pe castigo, non per burla
O l’aveiva di spegietti,
Ma spegietti indiavolæ,
Che o vedeiva eternamente
Tutte e cose infoletæ.
O l’aveiva poi d’arente
L’Aotö de Meistro Tacco
Che o piggiava da-i despiæ
Pe castigo de tacchæ
E de frasche con un bacco,
Pe avei fæto tacchezzâ
Co-a cançon so sbardellâ.
Arraggiou co-a cassarea
Poi ho visto o Sciô Gæa
Che o deveiva impì con quella
Pe castigo un-na scudella,
E o dixeiva sotto voxe,
Mai ciù vaddo là dà Foxe,
Mai ciù façço sciortì fêua
Pe guagnâ un pò de scaggieûa
Di pastiççi per poexie.
Me scappava in quando o rie,
De pensâ che questi poeti
Fussan tutti per castigo
Conune drento in to bäsigo
Ne-a perucca da Cometa
Pe avei fæto tutti o poeta.
Mi tremavo daa gran püia
Perchè divo se o contiô
Questo sêunno cose dian
Anche mi me carreghian...
Ma pazienza solo diô
O l’è un sêunno non poexia.
Poi ho visto che a spasüia
Da Cometa a l’accuggeiva
Tutte e carte che a vedeiva;
Ma a seveiva[sic] rispettâ
Quella Muza Portoglian-na
Che a ne parla da Comâ
Che a scombatte co-a grondan-na,
E che a sferza con giudizio
E con grazia sempre o vizio
Co-e sò föe scì graziose.
Scì ben fæte, scì succose.
Poi me paiva che a perucca
Da Cometa in scia mæ zucca
A vegnisse a riposâ
E a me voesse mi imbarcâ;
E dixeivo per caitæ
Non m’imbarca co-i despiæ,
Ne co-i poeti releghæ:
Mi poexie non ne façço,
Versci, e rimme tanto meno
Che per mi o l[’]e veleno.
Favan tutti gran fracaçço
Perchè mi a no m’ha imbarcou:
Ma dixeiva ti vediæ,
Mascarçon ti naufraghiæ!...
Mentre intanto a se partiva
A perucca a m’ha sponciou
Co-a so borsa che a serviva
De timon ai consummæ!!!...
Ma in tu[sic] megio ti m’adesci,
E ti picchi perucchæ.
Ma se mai ti te credesci
Tutto questo fosse vëo
Se sbagliemmo tutti a rëo:
Che a Cometa a l’è passâ
Senza fäne nisciun mâ:
Che l’usuia, e l’avarizia
Se ne stan sempre in letizia
E che i ricchi, e i pixionanti
Fan de nêuvo comm’avanti,
E che sempre i vitalizj
Spalanchian i precipizj
E ghe sa sempre di vizj:
Dai quæ solo peû avardâ
A Madonna cö Segnô,
Ma dovemmo ben pregâ
E fa tutto con timô,
Perchè è inutile scappâ
Sotto a man do Salvatö,
Se o ne voesse castigâ;
O n’ha esentou da di flagelli,
E da tanti atri bordelli
E o dovemmo ringraziâ...
Tutto quello m'assunnavo
O racconto tale quale,
E protesto in generale,
Che se o sêunno mi non fävo
Çertamente no o contavo
Perchè miga a n’è poexia
Ma o l'è un sêunno, e coscì sia.
A ZENA,
Stampaja Como, do 1832.
Con permiscion
- ↑ Træ oe opù Troue