O Cicciollâ 1930/Semplicitae cicciollea
| ←Oh! Savunn-a! | O Cicciollâ de Semplicitae cicciollea de Gioxeppe Cava |
Malinconie→ |
| lasciòu inalterâ a grafia do "Cicciollâ". |
Semplicitae cicciollea
Törta de seixo,
Törta de gran,
Un mezo litro,
Un po’ de pan,
L’è ’na çenetta
Da cicciollae,
Che costa poco,
E a l’impe assae.
Doppo se càrega
Ben a pipetta,
Se fa döe ciarle
Co-a patronetta,
E a fin se zêuga
A-a bescambiggia
Fra quattro amixi
Unn-a bottiggia.
Verso dex’ôe
O s’arza a veïa,
Se lascia tûtti
Co-a bonn-a seia.
Se törna a casa
Cö chêu contento,
Se arve a portinn-a
In t’ûn momento.
Poi se va a cuccio
Senza fracasso
E se coggiönn-a
O contrabasso.