O Cicciollâ 1930/Pescôei!

by Giulio Manoælo Minuto

←Donne moderne!

O Cicciollâ de Giulio Manoælo Minuto Pescôei!

Glossario→

lasciòu inalterâ a grafia do "Cicciollâ".

Pescôei!

I

Semmo i pescôei do mâ,
De nostre belle ciazze,
De Nöi e de Finâ,
De Çelle e de Varazze;
Gh’emmmo de rei da tiâ,
Di trèmagi e de nasse,
Gh’emmo ûnn-a barca armâ:
Coraggio, e bonn-e brasse.
Se o pescio o l’è filón
E o ne veû fâ o bordello,
Mangiandose o boccòn
Sensa mesciâ o nattello,
Ghe demmo o straordinajo
De fuscina e salajo.

II

Quando, in sce-o fâ da seia,
Se leva l’arbaxìa,
Isemmo presto a veia,
Sarpemmo l’àncoa, e via!
O çe stellòu s’inarca,
Gh’emmo per letto o mâ
E pe strapunta a barca;
Dormi? No se porrià?
Se o pescio o l’è filón
E o ne veû fâ o bordello,
Mangiandose o boccòn
Sensa mesciâ o nattello,
Ghe demmo o straordinajo
De fuscina e salajo.

III

Semmo i pescôei do mâ
Da Rivea de Ponente:
De tiâ de rei, pescâ,
Pochi ne pêuan sta arente;
Che a fâ sta profescion
Ghe vêu trae cöse grende:
Amô do mâ, pasciòn
E fegato da vende.
Se o pescio o l’è filón
E o ne veû fâ o bordello,
Mangiandose o boccòn
Sensa mesciâ o nattello,
Ghe demmo o straordinajo
De fuscina e salajo.

IV

Ma i ciû bülli pescôei
Son questi chi de Sann-a:
Ghe guarda sempre e rei

N'a stella tramontann-a:
A bella Madonnetta,
Co i versi do Ciabrèa,
Ch’a l’è lì in sce-a Torretta,
De grazie dispensea.
Se o pescio o l’è filón
E o ne veû fâ o bordello,
Mangiandose o boccòn
Sensa mesciâ o nattello,
Ghe demmo o straordinajo
De fuscina e salajo.