O Cicciollâ 1930/O neja!...
| ←Ciù vivo che primma | O Cicciollâ de O neja!... de Françesco Rochin |
A l’è finia!→ |
| lasciòu inalterâ a grafia do "Cicciollâ". |
O neja!...
Ad Antonio Pastore
Neia, e a vegne zù a strassetti
Ingianchindo tûtte e cose.
Ch’a se cince, ch’a se pöse
Dappertûtto, d’onde a veû!
A l’é a gioia di gardetti,
Che da-i eûggi ghe sfavilla
L’ardimento do Balilla,
Ch’o gh’ascäda e moén e i cheû.
Neia!... ûn paìze da Sciberia
L’é scappòu da i orsci gianchi
E aoa l’emmo propio a Banchi
E o se spuncia ancon ciû’n là.
Senti, Nino: a cosa, seria
A no l’é comme ä credemmo,
Perchè nuî gh’arrimediemmo
Con do bravo sciacchetrà.
Paxe ä paxe, guaera ä guaera:
No se scangia de natûa:
Chi a treisette ghe refûa
O finisce con pagâ.
Tiaene o collo a ûn pittantaera,
Chêugo, e faê ristreìto o broddo,
Poi veddieì che adaxo e ammoddo
S’arrangiëmo con Zenâ.
Checco, ti pòrtine ûn doggio,
Ma c’o n’agge de battezzo;
No m’importa, o gotto grezzo
S’o l’aviâ capaçitaê:
Poi, che a Gexa a sêunne a doggio
Per chi nasce e per chi mêue:
S’eì di câri unzêìghe e reûe
E scampiêì l’eternitae.