O Cicciollâ 1930/Nostalgia
| ←A Fûgasetta | O Cicciollâ de Nostalgia |
A mae Beppinn-a!→ |
| lasciòu inalterâ a grafia do "Cicciollâ". |
Beati i tempi quando Berta a flava!
Mâe nonna lì, in to vâno do barcòn,
In te vegge d’inverno, pôvea diava,
A te sfrûtava a lûxe do lampiòn
Pe vanzâse a lûmëta, perchè i scûi
Passâvan erti.... e i tempi ean assâe crûi.
Emo povei, ma povei proprio in canna,
E stâmo in t’in caroggio a-o primmo cian:
Un pö de pan o ne pareiva manna,
Ma alegri comme e ànitre in to riàn,
Mentre a nonna, innaspando e fiando o lin,
A ne contâva a föa do porchettin.
E çentanaêa de föe a ne destegava
E, in fondo a tûtte, a sò morale d’ûzo.
Se quarchedûn dormiva, a minacciâva
De tïaghe o remescello ed anche o fûzo,
Con l’azzunta de quarche pattonetto:
Ma invece pêu a ne dava ûn fenoggetto.
O tempi strabeàti e benedetti!
A-i ommi se creddeiva in sce-a parolla:
E donne non éan poi de pasta frolla,
Pinn e d’inciastri e pinn e de belletti:
De desghêugge e de fiâ non ean mai stanche
Te impivan de giancàja e casciabanche.
I costûmmi d’anchêu no van ciû ûn figo:
L’onestâe a l’è ben vana parolla:
Dappertutto ganciaje, inganni e intrigo
E a virtù a l’è lì ûnn-a cosa molla:
L’éa mëgio quando üzava i lûmmi a l’êujo,
Ma ognûn o l’éa segûo do seu relêujo.
L’è vëo che grandi cöse e strabilianti
O progresso moderno o n’ha portöu.
Ma i guâgni do progresso tûtti quanti
No compensan a quete do passôu:
Beati i tempi quando fïava Berta:
O se poeiva dormî co-a porta averta!