O Cicciollâ 1930/L'Inferno
| ←Giornâ de sô | O Cicciollâ de L’Inferno |
Serenata d’âtri tempi→ |
| lasciòu inalterâ a grafia do "Cicciollâ". |
L'Inferno
A-o mezo do cammin da nostra vitta
L’è brûtto avei e stacche senza un scûo;
Senza palanche, amixi, o no se pitta
E andâ a dormî zazzuin o l’è ben dûo.
Se gïa e se regïa drento o letto,
Mentre o pançin o litiga co-a schenn-a,
E a bocca, maeducâ, pe’ fa ûn scherzetto
Se slarga in to bagiâ da perde a goenn-a.
Inûtile çercâ de fala taxe,
E e lerfe ben serrâ perchè a no bage:
Convegne avei pazienza e in santa paxe
Vedde a famme corrî lungo e miage
Dante a Ugolin gh’à daeto ûn arçivesco
Da rezûggiâ famelico in eterno:
A mi bastiae ’na micca de pan fresco
Pe’ poei sciortî de butto da st’inferno.
Con sti stiamenti a mensonâ o pan fresco
Ingordo me creddiei, e me ne pento:
Ciû ûmile me fiò de san Françesco
Dixendo che siäe bon anche relento.