O Cicciollâ 1930/Disavventûa
| ←O mae Gnaognin | O Cicciollâ de Disavventûa de Gioxeppe Cava |
O barbê politicante→ |
| lasciòu inalterâ a grafia do "Cicciollâ". |
Disavventûa
L’ätro giorno a mae biondinn-a,
Biricchinn-a,
Da-o barcön a m’ha salûöu
E, co-a bella so magninn-a,
Gianca e finn-a,
Unn-a rêusa a m’ha cacciöu.
Ma ûn figgioame, che o passava
E o scigöava,
Vista a rêusa o l’ha acciappä,
Poi, amiando sciû a-o barcön,
Sto birbön,
« Marameo » o s’è misso a fä.
Non vorrendo avei ûn scacco
Da ûn macacco,
G’ho sûnnöu ûnn-a mascä
E, in to mentre che triönfante
A-a galante
Stavo a rêusa pe mosträ,
Quello figgio d’ûn gran trêuggio.
In t’ûn êuggio
’Nn-a tomata o m’ha sbrivöu....
Son restöu cömme Pinella
E a mae bella
O barcön a l’ha seröu....