O Cicciollâ 1930/Conseggi pë ben vive
| ←O barbê politicante | O Cicciollâ de Conseggi pë ben vive de Gioxeppe Cava |
O zanetto e o babolo→ |
| lasciòu inalterâ a grafia do "Cicciollâ". |
Conseggi pë ben vive
Mae pöae me diva un giorno: O mondo intrego
L’è cömme ûnn-a gran corsa a-o precipizio:
Da-a bunn-a donna a man ne passa a-o cëgo
E a morte a ven ciû fito che o giûdizio.
Zûghemmo tûtta a vitta a-o primo sato
E chi ghe dà de scciappe o resta sötta:
Ma i fûrbi, che san fä da lengua e sciato,
A casa mai no van cö-a testa rötta,
O perno da question: mettise in vista,
Piggiä ûn contegno adatto a circostanza,
Tegnî cö prêve e asci cö söcialista.
E l’ideale aveilo drento ä pansa.
A pansa, tegnî a mente, a lé ûn santuaïo
A-o quae no se fa offerte de parolle:
Davanti a ûn piatto bun o a ûn bun salaïo,
I ciû diventan, cäo, di braghemolle.
Amûggia de bigetti ûn bello motto,
I mezzi non importan, nè o mestë:
Un äse da dinè l’è ciû d’ûn dotto,
E dell’onöre futtite o panë.
Con sto scistema ti viviae ben visto,
Magari decoröu con quarche croxe,
Ma ti no te sarviae da-o giörno tristo,
Che, in mezo a quattro töe, ti vagghi a-a Foxe.