O Balilla strenna pe-o 1869/L'Eroe de Portoia

Da Wikivivàgna
O Balilla strenna popolare pe-o 1869
L'Eroe de Portoia
Zena, Stampaja do Comercio, 1868 - exemprâ conservao inta Libraja Britannica


[p. 35 modifica]

LA[sic] CACCIATA DI TEDESCHI DA ZENA
OSCIA
L’EROE DE PORTOIA



Unn-a fra e giornæ ciù memorabili e gloriose da nostra storia repubblicana a l’è çertamente quella do 10 Dexembre 1746. O spettacolo d’un popolo che indegnamente oppresso da-o sordatto straniero, o se solleva, e disperatamente o combatte e o vinçe unn-a battaglia, o l’è troppo imponente perchè o se posse dimenticâ; ma o resta pe exempio e schêua per tutte quelle votte che se posse presentà unn-a conscimile ocaxon. E l’exempio o non è stæto dimenticòu: e çinque giornæ de Milan e a difeisa de Venezia han fæto vedde ai prepotenti e a quelli che non san governâ, cose pêu un popolo quando o l’è ûnio.

Non è mæ intenzion de raccqntâve per menûo a storia da Cacciata di Tedeschi, a quæ a se compendia in queste [p. 36 modifica]poche parolle: O popolo zeneize indignòu pe-a debolezza do so Governo aristocratico, oppresso e avvilio da-o sordatto tedesco, o piggia i arme, o se mette a-a testa do Governo, o combatte e o vinçe; e quando Zena a l’è libera, sempre generoso e grande, o a rimette nêuvamente in man de quelli che, giudicando da-o passôu, se n’ean mostræ poco degni.

A mæ idea a l’è quella de dâve in ristreito un cenno storico de l’Eroe de Portoia, atteiso che biografia do Balilla, l’è o stesso che dî cacciata di Tedeschi da Zena.

Ecco i cenni storici che ricavo da un rariscimo manoscritto de l’abate Pasquâ Antonio Sbertoli, ch’o porta per titolo: O Balilla trionfante.

« Giambattista Perasso, figgio de Marc’Antonio, o l'è nasciùo a Prôulungo, frazion do paize de Montêuggio[1] , ai 8 d’arvî do 1729 in sce-a parrocchia de San Giambattista. Ancon piccin, so poæ o l'ha mandôu a Zena a imparâ l’arte do tenzôu da un chi aveiva a tenzaia in vixinanza de Portoia. Segondo s’usava e s’usa ancon [p. 37 modifica]fra i popolani zeneixi, a-o so nomme de Battista gh'han sostituïo quello de Balilla, nomme che o l'ha conservôu finn-a a-a so morte. Un fæto militare o l'ha presentôu occaxon a-o poveo paizanetto de diventâ un eroe e tramandâ a-a storia o so nomme immortale.

« L'anno 1746 s'è rotto guæra fra Maria Teresa reginn-a d'Ungheria, o re d'Inghiltæra e o dûcca de Savoia da unn-a parte , e i re de Franza, Spagna, Napoli e a Repubblica de Zena comme auxiliaia, dall'atra.

« Ne-o corso da campagna, Zena a l'è stæta abbandonâ da-i so Alleæ , e a s'è vista compari sotto e so mûage un'armâ de Tedeschi capitanæ da-o generale Antonio Botta-Adorno. O Governo da Repubblica ai 6 de settembre o l'è stæto costreito a sottoscrive unn-a capitolazion umiliante, in séguito a-a quæ o generale austriaco o moltiplicava e contribuzioîn in dinæ, e i so sordatti insultavan impunemente i çitttadin.[sic]

« L'ea o doppo disnâ do giorno 5 Dexembre; i Austriaci strascinavan pe-a [p. 38 modifica]stradda de Portoia un cäro con un mortâ da bomboe in çimma, che aveivan piggiôu d'in sce-e mûage do Bezagno. Quando son stæti davanti a gexa de Santa Maria da Purificazion (aoa teatro Colombo), o peizo do mortâ o l'ha sfondôu a stradda. O cappo da scorta, pe sollevâ a rêua do cäro abbattua into fosso, o pretendeiva che i çittadin ghe dessan aggiûtto; ma questi rifiutandose a un servixo coscì umiliante e coscì vile, se son retiæ in t'unn-a bûttega da droghê lì vixin. O cappo di Tedeschi, irritôu da questo rifiûto, o s'è misso a dâ de bastonæ.

« L'atto inumano, o l'ha suscitôu nell'animo generoso e indipendente go Balilla, lì accapitôu, giûsto risentimento, e dando man a un sascio: Che inse? o l'ha dito ai compagni , e o l'ha tiôu contro o prepotente caporale austriaco.

« L'azion eroica de questo nêuvo Davide a l'ha incoraggïo i popolani de Portoia, i quæ a-a primma sasciâ do Balilla han fæto seguitâ unn-a gragnêua de sasci, che i Tedeschi han dovûo scappâ abbandonando o mortâ. [p. 39 modifica]« Frattanto essendose levæ in massa i çittadin, o veo sovrano, o popolo o s'è costituio in Governo provvisorio, e o l'ha misso o so quartê generale in to Collegio di Gexuiti in stradda Balbi, dove l'è aoa l'Universcitæ. Popolo e tedeschi se son battûi disperatamente pe çinque giorni, e ai 10 Dexembre Zena a l'ea libera dai Tedeschi. Alolla a ea stæla comensâ co-o nomme de Dio e de Maria, e o popolo riconoscente o l'ha portôu a Santa Maria de Grazie unn-a bandea piggià a un picchetto de Tedeschi.

O glorioso avvenimento do giorno 5 Dexembre 1746 o se trêuva descrito in bunn-a scrïtûa che l'anno 1848 a se con coservava in t'unn-a scatoeta de chêuio da Nicolla Bisio vegio bancâ de Portoia, da quæ se ne credde autô o mæximo Balilla. Questa scrïttûa a l'è stæta pubblicâ in t'un opuscolo stampôu da Casamara ne-o 1848, dove se leze:

1746 1747, 5 decembre

« Io perasso detto u balilla ò incominciato a tirare un saxo e mi risposero andiamo avanti, mio Sio mi disse aspeta [p. 40 modifica]un poco che venga, mi ano portata una bandiera, lo presa in mano mi sono miso a gridare, andiamo avanti, altro non dico che il popolo lu sa, addio a tutti ».

Questa scrïttûa però, segondo afferma Giambattista Giuseppe Perasso nevo do Balilla, a saiva stæta inventâ da quelli che ne-o 1848 se spacciavan pe parenti do Balilla.

« Finia a guæra, o Governo da Repubblica voendo gratificâ o coraggioso Balilla , o gh'ha concesso un coscì dito Fondego da vin in ta stradda do Portello. Poca ricompensa pe un'azion cosci ardimentosa pe-a quæ risultava l'indipendenza da patria! ma i Governi con quelli che portan e braghe de frûstannio non son guæi larghê.

« Doppo pochi anni, ai 3 de lûggio do 1753, o Balilla o l'ha spozôu unn-a çerta Maria Francisca Contini, e o l'ha dito de sci in San Zorzo, e o moiva in sce-a parrocchia de San Steva ai 30 settembre 1781, dove o l'è stæto sotterrôu.

« O l'ha avûo diversci figgiêu , e fra i [p. 41 modifica]atri Antonio Giuseppe Gaetano, battezzôu ne-a stessa parrocchia de San Steva ai 13 marzo 1756 , e da-o quæ, ai 27 novembre 1800, nasceiva Giambattista Giuseppe Perasso, bon poæ de famiggia e onesto negoziante, abitante a-a Spezza ».

Chì no ve raccontiö o solenne çentanâ che se fæto a Zena o giorno 10 Dexembre 1847, essendo mæ intenzion de favene narrazion un'atra votta; terminiö invece questo cenno storico co-o breve racconto do ritorno do famoso Mortâ a-a Cava, so antico[sic] posto.

« Per dispoxizion dunque do Quartê Generale do popolo, o giorno 8 zenâ 1747, o mortâ o l'è stæto misso in sciûn cäro trionfale tutto apparôu, e tiôu da 8 cavalli, e accompagnaôu da duî battaglioîn de çittadin armæ e de 70 zoveni a cavallo con elmo e corazza che strascinavan in trionfo e insegne piggiæ a-o nemico, o vegniva portôu in sce-e mûage da Cava.

« O convoglio o l'ea precedûo da tambûi, pifferi e atri istrumenti, e sparo d'artiglierie , seguitôu da un generale e continuo crio de Viva Maria. [p. 42 modifica]« De ritorno da-a Cava, a comitiva a l'è andata a-a Nunziâ de Portoia dove a l'ascistiva[sic] a unn-a solenne funzion in onô de santa Caterinn-a. Diversci da comitiva portavan bandee dove gh'ean dipinte l'immagine de Santa Caterinn-a e quella da Madonna da Concezion , e o famoso Mortâ sorve o quæ gh'ea scrito La Libertà è vendicata, sciccomme canta l'egregio nostro poeta zeneize Steva Defranchi:

« Re bandiere in sea finna
« Pitturae da pittû bon
« Drento santa Caterinna
« E Maria da Concezion
« Con un scrito in ro mortâ
« Libertæ l'è vendicâ » .

« Pe conservâ poi a memoia do scito dove l'è sfondôu o mortâ, i çittadin gh'han misso un marmao quadrato con in rilievo a forma do mortâ; poco distante, ne-a facciata d'unn-a casa, gh'han fæto unn-a specie d'artâ con duî quaddretti: un rappresentante san Giacomo MaggiÔ a cavallo ch'o mette in rotta i Möi, e l'atro a Madonna da Concezion insemme a duî Santi, [p. 43 modifica]e sotto o gradin i trofei de guæra piggiæ ai Tedeschi, marchæ in rilievo ».

Da quell'epoca in poi (son 122 anni) i Tedeschi a Zena no gh'han ciù misso i pê, ma l'è appenn-a duî anni che son fêua de l'Italia. Son però vinti anni che in Italia gh'emmo i Françeixi, gente brave quanto i Tedeschi e forse ancon ciù, i quæ çertamente no çercan d'andâsene se un atro Balilla secondôu da-o popolo italian, o no rinnêuva o famoso Che l'inse? da-o Campidoglio o da-o Quirinale.


  1. Do 1881 'na comiscion muniçipâ a l'aviæ stabilio ese o Balilla nasciuo in Portoia o 26 ottobre do 1735 da Antogno Maja Perasso conso di tenzoèi de sæa. (cfr. E. Pandiani, Ancora sull'insurrezione genovese del 1746 e sul Balilla, in Giornale storico e letterario della Liguria, X, 1934.) - G. Musso