O Balilla strenna pe-o 1869/Introduzion

Da Wikivivàgna
O Balilla strenna popolare pe-o 1869
Introduzion
Zena, Stampaja do Comercio, 1868 - exemprâ conservao inta Libraja Britannica


[p. 3 modifica]

INTRODUZION





SUNETTO.

I.



D'uña Strenna o Balilla o fa o regallo
A tutti i so lettoî fissi e casuali ....
Forse pe scimiottâ çerti Giornali
Anche lê co-a so strenna o ven in ballo?

Coscì dian solo i ommi materiali,
Che han l'intelletto comme o mû e o cavallo,
O che ripetan, comme un pappagallo,
Ciarle inique, o avventæ, o superficiali.

O so scopo o l'è forse fâ dinæ?
Questo o no s'ha da dî marco pe scherso
Ne-i paixi dove regna a civiltæ......

Quello che aôa diö mi o poco diverso,
Devan dî i çittadin ben educhæ
E che piggian e cose pe-o so verso.

[p. 4 modifica]

SUNETTO

II.



A Strenna do Balilla a l’è un stendardo,
Ch’o spiega in testa a tutti i so giornali,
Invitando a seguîlo i liberali
Con ferme idee, e con animo gaggiardo.

Uña minaccia a l’è de ciù formali,
Che lê o perseguitiä senza riguardo
Governo e conseggê municipali,
Questi a-o ben lenti, e quello a-o mâ testardo.

Uña protesta a l’è che all'indipresso
Sempre ai grandi o diä o veo comme ai piccin
In barba a-o Fisco e a rischio d’un processo.

E se ne-o fa o paggiasso e o burattin
Do Giornalismo o vêu ëse sempre o stesso
Un cartello de sfidda a-o Gazzettin.

[p. 5 modifica]

SUNETTO

III.



Inoltre questa Strenna a chi ha gradio
O so Giornale a l’è un ringraziamento;
E per chi l'ha trovôu poco compio
A stessa a pêu servî de stpplemento;

Per chi ne-o Fêuggio poco o assæ s’è instruio,
A l’è comme un resciou, un divertimento;
E per chi quarche votta o fù colpio
Da uña sasciâ morale, a l’è un inguento;

E infin a l’è un avviso che con franca
Prosa e poexia in politica e in morale
A dî a veitæ o Balilla o no se stanca;

E un invito per questo in generale
A-i Zeneixi de spende a so palanca
Pe vegnîla a studiâ ne-o so Giornale.