O Balilla strenna pe-o 1869/Diversci
| ←Sciaradde | O Balilla strenna popolare pe-o 1869 Diversci "perchè" regalæ a-o pubblico insce-ô gusto do "Spegio" |
Sciaradde→ |
| Zena, Stampaja do Comercio, 1868 - exemprâ conservao inta Libraja Britannica |
DIVERSCI PERCHÈ REGALÆ A-O PUBBLICO
in sce-o gusto do spegio
I.
De l'ommo meno nobile.
A femina a l'è dita;
Eppù per cose in pubblico
O maio ô ghe da a drita?
II.
Perchè[sic] motivo a-e femine
Ghe manca per ô ciù
Moderazion e sæximo
Mancando a zoventù?
III.
Per cose l'etichetta
Ne-e vixite chi e fa
S'angoscia e chi i aççetta,
E intanto se ghe sta?
IV.
Per cose ciamman scimbolo
O combo d'onestæ,
Che in fâ l'amô co-e femine
O passa e so giornæ?
V.
Perchè dimmo Aze a un stupido
A moddo d'uña fraze,
Non oca, vacca, o pegoa,
Ch'en goffi, comme l'aze?
VI.
Per cose sta ciù ben
Chi vive de caitæ,
Che chiunque se manten
Co-ô stento de giornæ?
VII.
Perchè l'è spesso splendido
Ne-ô spende un fradellin
Ciù che un mercante o un nobile
Ch'ô l'ha i sacchetti pin?
VIII.
Perchè gh'è tante croniche
Dove ghe son ciù meghi;
Perchè fan duâ i Causidici
E lite di anni intreghi?
IX.
Perchè chi balla e canta
Se paga assæ de ciù,
Che un pesso da sciuscianta
Che instruisce a zoventù?
X.
Perchè l'è fra e distinte
Persone ciù insolente
Chi è vegnuo sciù da-ô ninte,
Che chi è nasciuo potente?
XI.
Per cose semmo ciù avidi
D'aveì l'ereditæ
D'un barba, che no-ô l'eimo
Pe-e lascite do poæ?
XII.
Chi me sa dî ô motivo
Per cose esaltan morto
Un ommo, che ancon vivo
Perseguitan a torto?
XIII.
Se piña de lê mæxima
L'è a donna, a che raxon
Ne l'appartoô uña femina
A gh'ha cosci ghignon?
XIV.
Perchè ne-i sposalizzii
Fra noî ô maio ô piggia
A deutta, e là fra i Arabi
Se paga ô poæ da figgia?
XV.
O se contrista l'ommo
Se cazze un mû in te prie,
Se scuggia un galantommo,
Perchè ô se mette a rie?
XVI.
Perchè stimemmo tanto
Ciù e cose, ch'en vegnûe
Dall'estero, che quanto
In patria se prodûe?
XVII.
Per cose a tanti liguri,
Ch'ean zà reppubblicani,
Democrazia, repubblica,
Ghe paan nommi profani?