Ms. Ricci 176/Sciu re vanité dro mondo
| ←torna a l'endexo | Poesie in lengua Zeneise de Sciu re vanité dro mondo |
Dio→ |
| Da-o ms. Ricci.176, Arch. Stor. do Comun de Zena, www.storiapatriagenova.it. azonto quarche acenti: acento grave = vocale curta, acento aguçço = vocale longa, -où = dittongo |
Sonetto
Con giusta norma d'un vorei superno
Tira un orbe celeste, e a noi resprende,
E da supremo mobile o comprende
L'orde ben regoloù d'un moto eterno.
Sotta de quello un atro ne descerno
Ro qua pin de belesse, e cose grende
Piggia in quattro contrarij, ch'o comprende
In discorde union stato, e governo.
In questo un microcosmo, e nasce, e muoe,
E patron de quant'è sotta ro só,
O domina re stelle quand'o vuoe.
Puoe tutt'è vanité, tutt'è nesció,
Erzite donca ò Muza se ti puoe,
Mira e canta lasciù ro gran Fattó.