Ms. Ricci 176/Cavagiero immascaroù donna dre frute a re Damme
| ←torna a l'endexo | Poesie in lengua Zeneise de Cavagiero immascaroù donna dre frute a re Damme |
Ro proconsolato de Frontin Lusco in ra Liguria - Satira.→ |
| Da-o ms. Ricci.176, Arch. Stor. do Comun de Zena, www.storiapatriagenova.it. azonto quarche acenti: acento grave = vocale curta, acento aguçço = vocale longa, -où = dittongo |
Da quella nobilissima rivera,
Donde se spassa l'oro in tre rumente,
Dond'in un só chi tira a ro ponente
Fissa lo sguardo in fin l'aquil'altera.
Sto cavagliero chi con ro ciumasso,
Porta con lé penne straordinarie,
Non è però con queste ciumme varie
Ch'o voresse parei quarch'oxellasso.
Anzi lé vuoe inferive per construto,
Ch'o n'è così lengié da cré in sonetti,
Ma con moralité senza fioretti,
O vuoe fá vei che lé tira a ro fruto.
A chi tocca sto fruto, haggié pu a caro
D'impará questa chì da un bell'umó,
Che comme in ro chiguoemaro in l'amó,
Ra zimma è dose, e puoe ro fondo è amaro.
Amó l'è giusto comme re serexe,
Perch'o tira con lé sento tapolli,
Re serexe garbuggian ri pegolli,
Però chi ne tir'unna ne ven dexe.
Patronna mé non ve fié de rolle,
Che questi zerbinotti, in concrusion,
Comme seolle van tutt'in canon,
Et han ciù scorse in fin che re seolle.
A chi tocca sto fruto bell'e bon,
Ro mostr'un poco a quello chi gh'è appè
E s'o domanderà, che figo l'è,
Ch'o ghe responde che l'è un arbicon.
Gran cose in fin significa ro pei,
Segondo razze, ma s'un mé patron
Vuoe savei cos'o l'è, dighe in canzon,
Sei così camoggin che non ro sei?
Questo persego chì dro pomin grosso,
Vuoe dí chi avia ri matti a re suoe perseghe,
Ghe corran, comme dixan, con re perteghe
Ma o proverbio vuoe dí dro spartilosso.
Beneito sé de Zena in fin re ville,
Onde re frute d'agra qualité
Son si dose, che puoéran zuccaré,
Fin re meire sarveghe, e meire grille.
Belle frute in America se vè
Ma gh'hemmo a Zena serti buoin boccoin,
Che chi ne gusta, in sciù ra feta fin,
Ri ciamma con raxon boccoin da Rè.
Fra queste frute lé porta ro vanto
Ro zeneise setron, se no m'inganno,
L'è bon, l'è san, l'è fruta tutto l'anno,
L'è fruta in ogni vaso, in ogni canto.