Ms. Ricci 176/Aurelia Comica - Sonetto
| ←torna a l'endexo | Poesie in lengua Zeneise de Aurelia Comica - Sonetto |
Sonetto - Semmo a Zena, o Patron tropp'in bricolla→ |
| Da-o ms. Ricci.176, Arch. Stor. do Comun de Zena, www.storiapatriagenova.it. azonto quarche acenti: acento grave = vocale curta, acento aguçço = vocale longa, -où = dittongo |
Sonetto
Tra ra carne stupendo è ro vitello,
Tra ri pesci ra Truta o Dentexetto,
Fra re cose de pasta ro Corzetto,
Tra re peire, e tra i vin ro moscatello,
Ro Tordo ancon fra qua se vuoeggie oxello,
Fra dosi, e boin boccoin, ro pastissetto,
In tra fruta de megio ro pei rossetto,
Dre gioie ro Diamante è ro ciù bello.
Tra i fiummi Po, tra monti Olimpo han vanto,
Tra scioi ra Ruoesa, e tra metalli l'Oro,
Ro Só fra ri pianeti vá atretanto.
Comm'un Giove in tri Dé dro sommo choro,
Così in talento, in gratia, e dose canto,
Fra ri comici Aurelia vá un tesoro.
Ben l'è unna Donna d'oro,
S'in fin ro nomme mostra a ra desteisa,
Ch'in somma a vá tant'oro quant'a peisa.