Lunaio Regiña 1891/8
| ←Donna bælla desgraziâ | Lunaio zeneize compilao da-o sciô Regiña & C. pe l'anno 1891 de A filosofia do cianze |
L'inconveniente d'aveì i denti→ |
| Zena, Stabilimento di Fræ Paghen, stradda Luccoi , n. 32 - exemprâ conservao inta Libraja Naçionâ Centrâ de Romma |
No sentï streppäve o chêu
Quande cianzan i figgiêu?
No ve vegne da concianze
Unn-a zovena chi cianze
No ve mêuve a compascion
Un chi cianze da-o magon?
2.
No ve vegne da patî
Solamente se sentî
Un chi cianze tra e cadenn-e?
No v'addescia mille penn-e
Un chi cianze da-o gran mâ,
Da-o continuo tribola?
3.
Anche cianze se veddei
Da l'eccesso do piaxei,
Sensa manco contradime
Questo cianze o l'è sûblime;
Questo cianze o særa in lê
Unn'idea tûtta do çê.
4.
Ma gh'è o cianze scimulôu,
Finto, fäso, avvelenôu,
Chi abbrûttisce e desfigûa,
Chi assascinn-a ûnn-a creatûa
Stæta fæta da-o Segnô
A mostrave ûn rïe d'amô.
5.
Quella là ch'ogni pittin
A l'ha i êuggi co-o puttin,
Tra o scingûlto, tra o sospïo,
A tradisce sò mario;
A l'agguanta ogni occaxon
Pe mandalo in perdizion.
6.
Çerte vidue sconsolæ
De sentïle fan pietæ.
Comme cianzan meschinette!....
E chi o l'è chi e pêu rimette?
Rassegnamele chi pêu?
Ma sei matti? rïan da chêu!....
7.
Quelli là che pe-o passôu
De pregä no n'han cessôu
Che creppasse ûn sò parente
No mediocre possidente;
Aoa cianzan o dinâ
Ch'o s'ha speizo pe mangiä.
8.
Chi ruggiva comme o can
Se mangiâvi un pö de pan.
Chi çercava ogni ripiego
Pe scacciave da l'impiego,
Aoa o cianze, pe fä dï
Che no l'ei sacciûo capï.
9.
Queste gente che ho citôu
No son brûtte, ma, peccôu,
In to cianze quæxi tûtte
Fan de faccie coscì brûtte
Che pan anime danæ
Da piggiale a sciarbællæ.
10.
Anche i povei de mestê,
Che v'accapitan pe-i pê
Con gran torto da Questûa,
Mentre cianzan pe impostûa
Fan di çerti mascheroin
Che ghe dæsci di mascoin.
11.
Chi de ninte fa o sappin,
Chi de poco fa o cianzin,
O l'è ûn ommo chi no sente
Quello dô coscì potente
Che, se lagrime o no n'ha,
Mai ciû paxe o no ve dà.
12.
Dime ûn pö, no ve ne riei.
Tütte e votte che lezzei
Unn-a lapide böxarda
Che de dîve a no s'avvarda
O compianto çittadin
In sciä tomba dö stroscin?