Lunaio Regiña 1890/Sûnetto 3
| ←Galileo in Arcetri | Lunaio zeneize compilao da-o sciô Regiña & C. pe l'anno 1890 Cristoforo Colombo davanti a-o Conseggio de Salamanca |
| Zena, Stabilimento di Fræ Paghen, stradda Luccoi , n. 32 - exemprâ conservao inta Libraja Naçionâ Centrâ de Romma |
de Salamanca
Sûnetto
Veddei quelli duî fratti che van via
E con êuggio de scherno e compascion
Battezzando Colombo pe mincion
Dixan ch'o l'ha o çervello chi ghe gïa?
Intaccalo no poendo d'erexia
Pe denunziälo a-a Santa Inquixizion,
Tentan de screditalo co-o landon,
Ciû potente che l'arma da böxia.
Ma che trionfo, che gloria e contentessa
Prêuva Colombo, sostegnûo da-a scienza,
Ne-a sò tranquillitæ, ne-a sò fermessa!
Mi, d'ammiä tanti miäcoi de pennello,
Ve diggo sccetto e netto e in confidenza:
A Barabin levemmose o cappello!