Lunaio Regiña 1888/Oh, son feliçe vixin a lê!
| ←Mammà che bæll'öxello | Lunaio zeneize compilao da-o sciô Regiña & C. pe l'anno 1888 de Oh, son feliçe vixin a lê! |
Ognûn i sò gûsti→ |
Romanza
Comm'a l'é bælla
Comm'a l'é cä
Quella bambinn-a
C'ho da spozä!
A pä ûn angiëto
Vegnûo da-o çë
Oh, son feliçe
Vixin a lê!
2.
A l'ha i cavelli
A rissettin,
I denti gianchi,
Riondo o mentin,
A l'ha e parolle
Che pän d'amê,
Oh, son feliçe
Vixin a lê!
3.
Comm'a l'é instrûia,
Comm'a sa fâ
Ben i sò conti
E travaggiâ
Tanto all'agôggia
Comm'a-o groscê!
Oh, son feliçe
Vixin a lê!
4.
Da-i disætt'anni
De ciù a no n'ha,
E d'ëse bælla
Manco a no sà.
Pâ ch'a ne sciorte
D'ûn monestê,
Oh, son feliçe
Vixin a lê!
5.
Comm'a l'é bælla,
Comm'a l'é cä
Quella che ûn giorno
Vêuggio adorâ
Comme s'adora
Unn-a moggê!
Oh, son feliçe
Vixin a lê!
V.