Lunaio Regiña 1888/O mondo di Lillipuzien
| ←O baxo | Lunaio zeneize compilao da-o sciô Regiña & C. pe l'anno 1888 de O mondo di Lillipuzien |
Sûnetto
Con dêuviâ di potenti cannociâli
Veddo spuntâme ûn mondo d'ommettin
Da mæxima grandessa, tûtti eguâli,
De talento e de chêu tûtti piccin.
E veddo re, ministri e generali,
Marcheixi, conti e ricchi çittadin,
Dotti, artisti, scienziæ, mëghi e legali,
Che ciù tanto l'ammïo me pan moscim.
E veddo promûlgâ lezzi piccinn-e
E remenâ de sciabbre pe i rissêu,
E stampâ libbri pin d'idee meschinn-e.
Che me vorte e me gïe donde se vêu,
Veddo teatrin, gëxette, casettinn-e,
Immagini e bûgatte da figgêu.
V.