Lunaio 1811/Indovinello 2.
| ←Indovinello 1. | Il favolista enigmatico - Lunario per le Dame - 1811 de Indovinello 2. |
endexo→ |
| torna a-i atri lunai |
Indovinello 2.o
Gh'è unna bestia con çent'euggi,
Tutta bocca e tutta moen,
Ch'a l'ingoa ciù assê di treuggi,
Ch'à l'ha o cœu pezo di chen;
Che s[']a pœu sempre a l'arroba,
Ciù a l'arroba ciù a ne vœu,
E che quando chinna a roba
A se sente un stilo a o cœu;
Unna bestia coi peì gianchi,
C[']a ve ven per tutto a drè,
Da Portoja a schitta a Banchi,
E da Banchi a schitta a Prè.
Quarche votta a se confessa,
E in te Gexe inzenoggià
A l'asbria ciù d'unna messa
Pè poeì megio mincionà:
Quarche votta a ve fa câo,
Tutta frasche e çiviltè,
Ma son frasche da gnao-gnao
Che finiscian con ciotê.
Quando a disna, con doi doggi
A sigilla o so disnà,
Poi de neutte pei carroggi
A camminna a rondezzà.
So chi a l'è, ma in mê zuamento
Bocca sciù non gh'euggio arvì,
Fermo ne o proponimento
De sta a vedde e ninte dì.