Li fioreti de messê san Francescho/33

←cap. 32

Li fioreti de messê san Francescho cap. 33

cap. 34→

da-o manoscrito Marston 56, f. 133r. - 156v., da libraja Beinecke de Yale, 1465;
clicca i asterischi pe di rafronti co-a verscion toscaña;
clicca o segno ⇔ inta colonna de scinistra pe vixoalizâ a verscion toscaña a fronte

33.

Santa Ihëra, devotissima desipora de la croxe de Xe. e nobermenti ihanta de san Francescho, e la qua era de tanta santitae che non soramenti li Veschi e li Cardenai la dexiravam de vei e de odilla, ma eciamdee lo Papa la dexirava de vei e odilla con grande effeto, e spesse vote o la vexitava personamenti.

E inter le atre vote lo Papa ze una vota a lo monestê per vexitalla e per parllage de le cosse sellestiae; e seando cossì inseme in divin raxonamenti, e inter questo mezo santa Ihëra fè aparegâ la tora e ge fè mete de lo pan, asochè lo Papa lo benixisse. E pöa che fo conpio lo sprituâ raxonamento e inzenogandosse santa Ihëra con grande reverencia si ge disse che ge piaxesse de benixî lo pan chi era sum la tora. E lo Papa ge respoze: "Fidellissima sör Ihëra, e' vögo che ti lo benixi e che sorve ello ti ge fassi lo segno de la santa croxe de Xe., a la qua ti te g'ê tuta daita". E santa Ihëra respoze: "O santissimo Paire, perdoname, che sarea degna de grande reprenssiom se avanti lo Vichario de Xe. mi, chi sum una vilissima femeneta, e' perzumasse de fâ la benissiom". E lo Papa ge disse: "Asochè questo non te sea inputao prezenciom, ma merito de obediencia, e' te comando per la santa obediencia che sorve questo pan tu ge fassi lo segno de la santa croxe." Alaora santa Ihëra, figa de la obediencia, odando lo comandamento de lo Papa, in lo nome de Dee benixì quello pan con lo segno de la santa croxe, e maravegoza cossa fo a vei che tuto quello pan se tagà in croxe. E de lo qua pan parte ne fo mangⁱao e parte fo resarvao per miracoro. E pöa lo Papa se partì lasando santa Ihëra con la soa benissiom.

E in quello tenpo, stagando in quello monestê sör Ortorana maire de santa Ihëra e sör Agneize, sör soa, sta^gando inseme con santa Ihëra piña de vertue e de Sprito Santo e con monte atre sante done, a le quae san Francescho mandava monti maroti; e elle con le lor oracioim e con lo segno de la santa croxe tuti reseveivam sanitae.

A lozo e a gloria de messê Ihu. Xe. e de san Francescho.