Lûnäio zeneize 1932/Revista
| ←Prefazion | Lûnäio zeneize pe l'Anno bisesto 1932 de Revista |
Storia vëgia→ |
A i sò tempi o Sciô Reginn-a
o l'andava ogni pittin
a fâ a sò passeggiatinn-a
pe a Çittæ, co-a Cattainin,
che a vendeiva e sò nissœue
mëze pinn-e e mëze vœue.
E, lì, senza complimenti,
se demoävan a notâ
tûtti quelli inconvenienti
che se sæ posciôu evitâ
pe-o decoro da Çittæ
(giûstamente rilevæ
a chi aveiva l'incombensa
de provvedde a eliminâ,
con critëio e intelligenza
tûtto quanto stava mâ,
e che Lê, co-a sò Revista,
o metteiva ben in vista).
Aöa mi no ho a pretensciòn
de fâ comme o Sciô Reginn-a,
primma: perchè no son bon
e no ho a sò parlantinn-a,
poi, perchè pe rileväli
gh'è di belli e boin giornali.
Ma sciccomme ben o mâ
quarche cösa devo dî,
sensa troppo criticâ,
sensa voéì fäme scöxî,
limitiô questo mæ scrito
a-o passôu, pe fâ ciù fito.
Anche 'st'anno o l'è finïo!
Ciù che mâ. o l'ha fæto ben,
ringraziemmo dunque Dio,
da fedeli e boin Cristien,
augûrandose tra nöî
ciù feliçe o trentedöî.
Con a crisi generale
che imperversa dappertûtto,
a l'è cösa natûrale
che ghe segge ûn pô de brûtto,
ma però sento che i ätri
stan ciù pezo assæ de noiätri.
Passo dunque a enumerâ
i diversi avvenimenti
che se deve examinâ
con propoxiti prûdenti,
ma ciammando, in portolian,
vin o vin e pan o pan.
Coscì metto in primmo lœugo
ne-a Revista da Çittæ
a consegna do Confœugo
che A Compagna a fè a-o Poistæ,
vegia ûsanza, suggestiva,
che a rinasce anchœu ciù viva.
E zà che ho dæto prinçipio
nominando o Sciô Poistæ,
che o tûtela in Municipio
o bon nomme da Çittæ,
ghe mandiô ûn salûo pe tûtti
vëgi, zoeni, belli e brûtti.
Da gran tempo se annunziava
do Bezagno a covertûa,
ma nisciûn se ne occupava
benchè a dèssan pe segûa,
pe-a consueta scinfonïa
de mancâ o södo a fâ a lïa.
Un quintale de progetti
ean zà stæti examinæ
da inzegnê bûlli, architetti...
ma ancon lì saïvan restæ
(finn-a che sæ stæto tardi)
sensa o Senatô Broccardi,
o quæ avendo ben compreìsa
l'importanza do travaggio,
sensa fâ quistion da speìsa
a-i contrasti ha dæto ûn taggio,
e mediante a sò energia
aöa l'òpea a l'è compïa,
e da Sua Altessa Reale
con gran pompa inaugurâ;
con vantaggio poi speciale
dell'igiene trascurâ
pe-e çinçae ch'ean generæ,
a miggiæa, da-e ægue cöæ!
Mèita d'ëse arregordôu
o vintûn de arvî, ne-o quæ
tûtta Zena ha festezzôu
co-a ciû gran cordialitæ
e solennitæ fascista
ûn Congresso e ûnn-a Rivista.
Quæxi trentamïa scarpoìn
se son dæti appuntamento
convegnûi chi da-e Regioìn
de l'Italia a çento a çento,
ben contenti de troväse
torna insemme, pe abbraççase.
Han formôu ûn lungo Corteo
de zoenotti e de buscetti,
dove gh'ëa de tûtto a rëo:
Çentanæa de Gagliardetti,
con de Bande in quantitæ
e di emblemi ben pensæ:
Sei piccosse da Giganti,
'na gavetta, ûn parasô,
e cartelli, no sò quanti,
poi ûn zaino, e in mezo a lô
ûn cappello de cemento
che o bastava a ûn Reggimento.
E in to mentre che sfilavan
se sfogavan a cantâ:
« Sul cappello che portiamo
vi è una lunga penna nera,
che ci serve di bandiera
quando andemmo a guerrezzâ! »
Poi, pe-o « Canta che ti passa »
in çà e in là diversci cöri
rallegravan tûtta a massa
con « quel mazzolin di fiori ».
A l'ëa tale scinfonia
che a metteiva in allegria.
L'indoman se n'èn andæti,
cordialmente salutæ,
ben contenti e soddisfæti.
A-i sò paixi ritornæ
st'accoglienza raccontian,
che mai ciù no se-a scordian!
Doppo tanto, finalmente,
vegne a Zena inaugûrôu
o grandioso Arco, imponente
« ai Caduti » dedicôu
perchè o ne perpetue a gloria
in sce-a ciassa da Vittoria.
E pe rende ciù importante
questa gran solennitæ
da-a Provincia circostante
l'è vegnûo in gran quantitæ
gente d'ogui ceto, a rëo
che han lô ascì formôu o corteo.
Emmo pûre avûo l'önô
che o Re nostro o l'ëa con nöî,
no gh'è stæto ätro che o sô
che o s'è fæto ûn pô scöxî
comme ûn vero mascarson,
con bagnäne, in to ciù bon.
Ma, in complesso, a cerimonia
a l'è stæta celebra
con perfetta parsimonia
perchè a l'è riuscïa a provâ
l'affezion riconoscente
che a-i sò morti, ha a nostra gente.
Mentre, ansiosi, se sperava,
a disgrazia a n'ha colpìo,
che, purtroppo, ne mancava, —
perchè o l'ea ciammôu da Dio —
o valente Dûcca d'Aòsta
che-o no ha conosciûo batosta.
Questo eroico Generale,
nostro Gran Conçittadin,
tra o compianto universale
o conclûdde o sò destin,
ma restiâ sempre in ta Stöia
o Sò nomme e a Sò Memöia!
L'è imposcibile contâ
a gran quantitæ de gente
da ogni parte radunâ
ne-o vixin Sestri Ponente
quande s'è varôu o Vapô
che a-i Ansaldo ha fæto önô.
Diggo o « REX » nomme augurôu,
gloria e vanto da Marinn-a,
che o Re stesso ha battezzôu
co-a Reginn-a pe Madrinn-a,
fra o tripûdio generale;
benedïo da-o Cardinale
Minoretti, in pompa magna.
Visto o varo de in sce-o mâ
de in sce-a spiaggia, o da-a montagna,
a l'ea cosa da incantâ,
ûn spettacolo stûpendo,
ordinôu, in to sò invexendo!
Vanni, Nave forte e bella,
porta a-o vento in sce ogni mâ
a Bandëa d'Italia, quella
che se deve rispettâ.
Fà conosce a tûtti, e ben
a possansa di Italien !
Ferragosto! Tûtti aveivan
'na gran vœuggia de demoäse
con de gite, ma no poeivan
fälo pe no arrovinäse,
che pe poèi lasciâ a Çittæ,
gh'oëiva ûn mûggio de dinæ.
Ma o governo, con geniale
previdenza o l'ha istituïo
l'Escûrsion Domenicale,
che a l'ha conquistôu, d'asbrïo,
quanti aveivan scimpatïa
pe ûn viaggetto in ferrovia.
Queste gite, combinæ
pe diletto e pe istrûzion,
specialmente van lödæ
perchè offran öcaxion,
scïa da soli o in compagnia,
de ûnn-a grande economia.
Gh'è de ciù, e o l'è o ciù importante,
che o laoante comme o Sciô,
scïa dârente che distante,
pœuan conoscise tra lô
e trattase comme fræ
vixitando e sò çittæ.
Coscì adaxo, cianinetto,
se formiâ o nœuvo Italian:
anchœu a mezo de un biggetto
a bon prexo, e poi, doman
quarcos'ätro che o porriâ
tûtti quanti contentâ!
Regordiô ûn avvenimento
straordinaio in mæ veitæ,
vœuggio dî o bombardamento
fæto (in prœuva) da Çittæ,
con o fin de dimostrâ
a potenza de l'armâ
aeronautica. A difeisa
troppo tardi a l'è arrivâ
che, se mai l'ëa vëa l'offeisa
tûtta Zena a l'ëa ascciannâ,
e fra gas, metraggia e bombe
a sæ stæta ûn'ecatombe.
Ma aöa che l'esperimento
pienamente o l'è riuscïo,
nöî pensemmo, con spavento,
— pe caitæ no-o vœuggie Dio! —
cöse sæ da nostra tæra
in to caxo de ûnn-a guæra.
Però, fortûnatamente
gh'è chi pensa a tûtti nöî,
e sciccomme, fatalmente,
tûtti quanti emmo da möî,
procuremmo, se se pœu,
de no möî in to rattaiœu!
Unn-a bella novitæ,
— dimmo quello che se vœu —
ne l'ha fæta o Sciô Poistæ
che, pe fâ demöâ i figgiœu,
con pensiero delicôu,
l'Accassœua o l'ha trasformôu,
e l'antiga passeggiata,
che de sfœugo çittadin
a l'aveiva a nominata,
— ma a no ea manco ciù un giardin
— diventâ a l'è in te ûn momento:
« Parco de divertimento » .
A scimpatica clientela
di leggiera e pensciona
— gren zûgoeì de damma e tela,
a-i sedili accavallæ —
a se trœuva disturbâ
pe no dî che a l'è sfrattâ.
Aöa a-o posto da peschëa
(che fin'aöa o l'ëa servïo
pe zûgaghe intorno allëa)
elegante e ben finïo
gh'è un laghetto in miniatûa,
e de fianco — con gran cûa —
ûnn-a pista pe-i figgiœu
che, segûi, pœuan scorattâ,
sensa dâ di battichœu,
tûtta intrega ûnn-a giornâ,
ben feliçi de demöase
anche a costo de stancâse.
Pe fâ a cronaca dell'anno
nœuve, avieivo da elencâ
tutto quanto — sensa inganno —
s'è zà fæto e s'è apprœu a fâ,
benchè, — dito in confidensa —
porriæ, creddo, fâne sensa,
che di fæti principali,
che mi ascì v'ho zà accennôu,
n'ha parlôu tûtti i giornali.
O faïô dûnque in te ûn sciôu
coscì presto sâ finïa
questa lunga litania.
Pe allögiâ o « Rex » s'è allungôu
ûn baçî de carenaggio:
l'è o Bezagno scistemôu;
e zà avanti l'è o travaggio
necessaïo, assæ importante
pe-o raccordo de Via Dante.
L'è zà pronta a galleria
da collinn-a de Caignan,
e comença a scinfonia
do piccon do massacan
che o s'affanna a fâ do zetto
tra Via Fieschi e ûn caruggetto.
O Poistæ o l'ha dicciarôu
che se andiâ de lungo avanti
tanto pe poeì dâ do laôu
a-e maestranze e a-i scariolanti
che a-a famiggia han da pensâ
pe no fäla tribolâ
quest'inverno. A nœuva ciassa
da Vittoria han terminôu
— l'han ridûta ûn pô ciù bassa
de l'antigo cian do Prôu —
ma a l'è ûn'opera grandiosa
co-o sò Arco: mäveggiosa.
Questo in quanto a-e costruzioin
nœuve, ma doviô accennâ
ûn pô ascì a-e demolizioin
che a döe vœuggio limitâ:
döe memöie cäe, che nöî
emmo visto scomparî.
No gh'è ciù o vëgio ciantê
che l'ëa a-a Föxe — renommôu
da Cravero, Orlando, Odê
finn-a all'apice portôu;
comme passa ascì in ta stöia
l'archivotto de Via Döia.
Ma sciccomme l'è destin
che s'ha da desfâ pe fâ
ogni bravo çittadin
o no deve che lödâ
quante fà l'Autoritæ
pe abbellî de ciù a Çittæ.
Poi gh'è 'st'ätra dæta storica,
che tûtti han scolpìo in to chœu,
celebrâ, sensa rettorica,
ma con Fede grande, anchœu
e zà consacrâ in ta storia
comme dæta da Vittoria.
Là, dattorno a-o monumento
a-i « caduti » dedicôu
s'è con vëo raccœggimento
do gran popolo adunôu
d'ogni ceto, d'ogni etæ
in omaggio a-i nostri fræ
e l'istante ciù imponente
che ha causôu ciù commozion
o l'è stæto quande a gente
a l'è cheita in zenoggion
dûänte a messa de Præ Massa,
pe pregâ co-a testa bassa
Çerto i morti avian provôu
ûn gran fremito de gioia
ne-o sentî comme onorôu
do loro atto l'è a memoia
pe l'immenso benefizio
che ha portôu o lô sacrifizio.
E con questo særo a lista
de 'sti meixi ch'è passôu
e finiscio a mæ Revista.
Perdonæ se v'ho ascidiôu
no ne aveivo l'intenzion
e... a fâ mëgio no son bon.
Bonn-e Feste! Bon Natale
mi ve auguro, lettöì
e ve fasso ûnn-a cambiale
pe-o dexembre trentedöî
dove, spero, tûtti sèn
arriviemo. Stæme ben!
.jpg) |
Se ei e strapunte dûe, vëge, sottî, |