Lûnäio zeneize 1932/Presentazion
| Lûnäio zeneize pe l'Anno bisesto 1932 de Presentazion do Davide Ciossón |
Prefazion→ |
L'amigo e « compagno » « ORE LEO » o ritorna, con questo sò Lûnaïo ûn pô a-i tempi di nostri vëgi, quande no se parlava de radio, no existeiva de cinematografo, e a gente a disnâva a quattr'öe; quande, in te ûnn-a parolla, de elettrico no se conosceiva...... che a ræna de Volta.
In te quelli tempi «Il Lunario del Signor Regina e Soci» o costitûiva, a-o prinçipio de ogni anno, quaexi ûn avvenimento çittadin, perchè oltre e notisie che interessavan i coscì diti ommi de affari, l'elenco de tûtte e Autoritœ e de personn-e che crovïvan de cáreghe pûbbliche ecc. o contegniva anche de poexie de Martin Piaggio e di mëgio sò colleghi contemporanei, con conseggi, predisioin, epigrammi, satire; ûn complesso de cösette varie che formavan quaexi ûn'insalatta rûssa de prim'ordine.
A poco a poco, però con o progresso tûtto se modifica; e l'antigo Lûnäio o l'è diventôu ûnn-a vêa e propria Guidda; se n'è andaêto o contorno e l'è restôu o rosto, cioè l'è sparïo quello che poëiva êse sûperfluo e ha piggiôu campo invece quell'insemme de notisiaio importantiscimo e ûtiliscimo che tûtti poeuan anchoeu trovâ in ta Guidda di Frae Pagan, a quae a se poeû dî, sensâ puïa de sbagliâ, ûnn-a de mëgio, se non a ciù perfesionâ de quante ne existan in Italia.
E a pövea poexïa, e i tanto divertenti diarii e i ätri accessorii di vëgi armanacchi avieìvan dovûo scomparî do tûtto, senza remisciòn?
« ORE LEO » o l'ha pensoù che sensa voeî sostitûîse a-o Sciô Reginn-a antigo, no l'ea ciù tempo de lasciali dormî e o l'ha vosciûo svegiäli con questo Lûnaïo.
O l'ha faêto beniscimo perchè, sensa ëse passatisti, qualche vòtta tornâ, magari pe poco, in to passôu voeû, dî piggiäse ûn bagno de serenitae e rinvigorise e forse pe mëgio affrontâ e vinse e difficoltae da vitta da giornâ d'ancheû.