Lûnäio zeneize 1932/O suicidio de Bastian
| ←Dichiarazion | Lûnäio zeneize pe l'Anno bisesto 1932 de O suicidio de Bastian |
Insemme in vitta e in morte→ |
Quande se dïxe: nàsce desgraçiôu!
Bastian, bon fradellin, ma sensa sorte,
visto che in tûtto quante o s'ëa provôu,
tûtte e cöse ghe andavan sempre storte,
stanco da vitta, stanco de lottâ,
o l'ha deciso che o se sæ ammassôu,
coscì o l'aviæ finïo de tribolâ!
E, pe ëse ben segûo do fæto sò,
o se saieiva primma avvelenôu,
poi con 'na rivoltella,
— co-a corda a-o collo, pe restâ impiccôu —
o se sæ fæto ascì sätâ a çervella,
e, comme còrmo d'ogni precauzion,
in ta supposizion,
che se rompisse a ramma che da forca
a ghe doveiva fâ,
o l'ha scelta in sce ûn erbö sorve o mâ,
perchè dæto anche un cäxo sfortûnôu
o sæ morto negôu!
Con tûtto 'st'apparato me o voeì dî
comme o fäva a no möî?
E, ben deciso, doppo avèi bevûo
ûn pô de sublimato corrosivo,
passôu a testa in to lasso, o s'è sparôu
bûttandose in to vœu, ma... sempre vivo
pe-a sò sorte perversa o s'è trovôu;
che a balla da pistolla, — intelligente —
a corda a l'ha taggiôu,
lê o l'è cheito in te l'ægua, e immantinente
ûn pescôu che ëa lì sotto o l'ha sarvôu,
e l'ægua a gh'è servïa de vomitivo
pe bûttâ o sublimato corrosivo!!!
o l'ha provôu a maiäse!