Lûnäio zeneize 1932/O ratto emancipôu
| ←A grigöa e o scorpiòn | Lûnäio zeneize pe l'Anno bisesto 1932 de O ratto emancipôu |
E spighe e o papäveo→ |
Un ratto de coniggio ch'ëa sciortïo
da poco de in to nïo,
ûn giorno con sò fræ o se lamentava
perchè no ghe gûstava
stâ sottomisso a-o poæ,
che, co-a sò autoritæ,
co-i sò conseggi, sempre o l'angosciava...
« Scappa da-i gatti, schiva o rattaiœu
che o l'è pericoloso,
no allontanate troppo, fà attenzion,
no ëse tanto goloso,
che, quæxi sempre, drento a ûn bon boccon
gh'è do veleno ascoso » ;
Ma o rattin, che o creddeiva
saveìne ciù che o poæ,
de questi avvertimenti o se ne rieìva,
e, comme un mainâ vëgio, o mugnugnava,
fintanto che ûnn-a nœutte, sensa lûnn-a,
quande proprio nisciûn l'immaginava,
quaccio, quaccio, de in casa o l'è scappôu
deciso a andâ pe-o mondo a fâ fortunn-a:
e o s'è, pe ûn cäo d'ormezzo, arrampinôu
a bordo a ûn bastimento
d'ëse libero, âfin tûtto contento.
Appenn-a a bordo, mentre o stava a ammiâ
dove o se poeiva infiâ,
gh'è capitôu dappresso ûnn-a legnâ
schivâ pe pûro cäxo,
ma che a g'ha fæto dâ sangue da-o naso,
e, intanto che o scappava comme un matto,
se o no l'incontra a tempo ûn pertûsin
o cazze in bocca a-o gatto
e.... te salûo vexin!
Però o l'è stato tanto affortûnôu
che, doppo, in fondo a-a stiva o s'è trovôu.
In to silensio, a-o scûo
ghe païva, finalmente, ëse segûo,
ma doppo ûn pô o no poeiva ciù respiâ,
o se sentiva a testa in confûxiòn,
(l'è che in coverta stavan a laöâ
pe fâ a disinfesiòn)
e se o no se sbrigava a scappâ presto
o l'ëa bello che lesto!
In te quello momento de anscietæ
gh'è vegnûo in chœu i conseggi de sò poæ!
Corrindo avanti e indietro, spaventôu
o l'ha trovôu ûn passaggio allepeghïo,
sûbito o se gh'è infiôu,
ma quande doppo tanto fadigâ
a sciortî fœua do bordo o l'è riuscïo
— oltre che a corrî o rischio de negâ
perchè o l'ëa cheito in mâ —
co'n ciôdo maledetto o s'ëa inguerçïo.
Cianzendo: a stento, o l'è posciûo arrivâ
bagnôu, mucco e ferïo,
in to coniggio dove o l'ëa partïo
solo da quarche öa,
ma o l'aveiva assæ meno presunzion
pe-a sò emancipazion;
e, in to mëgalo, ghe dixeiva o poæ:
« Spero ti tegnæ conto da lezion
A vitta che ti a piggi pe demöa
a l'è un problema che o vœu riflesciòn
e o no se scioglie sensa
quella che i vëgi ciamman esperiensa! ».